గోల్కొండలో బోనాల ఉత్సవాలు ప్రారంభం; తొలి బోనం అమ్మవారికి సమర్పణ

హైదరాబాద్‌లోని గోల్కొండ కోటలో బోనాల ఉత్సవాలు ప్రారంభమయ్యాయి. గురువారం జగదాంబిక అమ్మవారికి ప్రభుత్వం తరపున పట్టు వస్త్రాలు సమర్పించారు. అసెంబ్లీ స్పీకర్ గడ్డం ప్రసాద్, మంత్రులు కొండా సురేఖ, పొన్నం ప్రభాకర్ లంగర్ హౌస్ చౌరస్తా నుండి పట్టు వస్త్రాలతో ఊరేగింపుగా వెళ్లారు.

చోటా బజార్ సమీపంలో పోతురాజుల విన్యాసాలు, మహంకాళి అమ్మవారు విగ్రహాల ప్రదర్శన ఆకట్టుకుంది. సాయంత్రం 7 గంటలకు కోటపైకి ప్రదర్శన చేరుకుంది. అనంతరం కుమ్మరులు జగదాంబిక, మహంకాళి అమ్మవార్లకు తొలి బోనాన్ని సమర్పించారు.

మంత్రి కొండా సురేఖ మాట్లాడుతూ, బోనాల పండుగ అత్యంత ప్రాచీన శక్తి ఆరాధన అని, 900 సంవత్సరాల చరిత్ర ఉందని చెప్పారు. ప్రతి ఏటా హైదరాబాద్‌లో అంగరంగ వైభవంగా నిర్వహిస్తామని తెలిపారు. మంత్రి పొన్నం ప్రజలకు బోనాల శుభాకాంక్షలు తెలిపారు. హైదరాబాద్ ప్రజలు కుటుంబ సమేతంగా జరుపుకునే పండుగ ఇదని చెప్పారు.