CWG 2026: జూడోలో భారత్కు తొలి స్వర్ణం, విషాదం నుంచి విజయం సాధించిన అస్మితా

గ్లాస్గో వేదికగా జరిగిన 2026 కామన్వెల్త్ క్రీడల్లో భారత జూడోకా అస్మితా డే మహిళల 48 కేజీల విభాగంలో స్వర్ణ పతకం గెలుచుకుంది. ఇది కామన్వెల్త్ గేమ్స్‌లో జూడోలో భారత్ సాధించిన తొలి స్వర్ణం. కెనడాకు చెందిన హైడీ క్వాచ్‌పై ఫైనల్లో గెలిచిన అస్మితా, తన మానసిక స్థైర్యంతోనే ఈ విజయం సాధించినట్లు చెప్పింది.

'నాకు ఓడించాలన్న పట్టుదల, మైండ్‌సెట్ మాత్రమే నన్ను గెలిపించాయి' అని 23 ఏళ్ల అస్మితా అన్నారు. అయితే ఈ చారిత్రక విజయానికి కొద్ది రోజుల ముందే ఆమె జీవితంలో పెద్ద విషాదం చోటుచేసుకుంది. అస్మితా తండ్రి బ్రెయిన్ స్ట్రోక్‌తో మరణించారు. ఆయన ఆమెకు అత్యంత మద్దతుదారు.

'నేను ఓడిపోయినప్పుడల్లా నాన్న నన్ను ప్రోత్సహించేవారు. నువ్వు ఒకరోజు ఛాంపియన్ అవుతావు, చింత పడకు అని చెప్పేవారు. ఆయనే నా ఆదర్శం' అని అస్మితా భావోద్వేగంగా తెలిపారు. ఆమె కోచ్ మాట్లాడుతూ, 'తండ్రి 13వ రోజు కర్మ జరిగిన రోజే అస్మితా తిరిగి వచ్చింది. ఆమె ధైర్యం చూసి మేము వెంటనే ఆమెను యూరప్‌కు పంపించాం. ఆమెలో విల్ పవర్ ఆరంభం నుంచీ ఉంది' అని వివరించారు.

ప్రస్తుతం ఢిల్లీలోని అకాడమీలో అస్మితా యువ జూడోకాలకు ప్రేరణగా నిలుస్తోంది. 'ఆమె గెలిచినప్పుడు భారత్‌ను రిప్రజెంట్ చేస్తున్నట్లు అనిపించింది. భారత్ తొలిసారి జూడోలో గెలవడం చూసి చాలా గర్వంగా ఉంది' అని ఒక విద్యార్థి స్పందించాడు. తండ్రి కలను నెరవేర్చిన అస్మితా భవిష్యత్తులో మరిన్ని అంతర్జాతీయ టోర్నమెంట్లలో భారత్‌కు ప్రాతినిధ్యం వహించనుంది.