అసోం వరదలు: 80 మంది మృతి, 2.12 లక్షల మంది జలదిగ్బంధంలో

అసోంలో వరద పరిస్థితి మరింత తీవ్రమైంది. ఇప్పటివరకు 80 మంది మరణించినట్లు రాష్ట్ర విపత్తు నిర్వహణ సంస్థ ధృవీకరించింది. 2,12,000 మంది ప్రజలు నీటి ముంపులో చిక్కుకుని ఇబ్బందులు పడుతున్నారు.

చరాయిదేవ్, గోలాఘాట్, జోర్హాట్, శివసాగర్ జిల్లాలు ఎక్కువగా ప్రభావితమయ్యాయి. చరాయిదేవ్‌లో 80 వేల మంది, శివసాగర్‌లో 71 వేల మంది, జోర్హాట్‌లో 40 వేల మంది ఆపదలో ఉన్నారు. ప్రభుత్వం 112 సహాయక శిబిరాలు, నిత్యావసర సరుకుల కేంద్రాలు ఏర్పాటు చేసింది. ఈ శిబిరాల్లో 75,583 మందికి ఆశ్రయం కల్పిస్తున్నారు.

భారత ఆర్మీ, NDRF, SDRF, అగ్నిమాపక, పోలీసు సిబ్బంది రక్షణ చర్యలు చేపట్టారు. 437 గ్రామాలు పూర్తిగా నీట మునిగాయి. 17,198 హెక్టార్ల పంట పొలాలు నాశనం అయ్యాయి. నుమాలీఘాట్ వద్ద ధనిశ్రీ నది ప్రమాద స్థాయిని దాటింది. అధికారులు అప్రమత్తంగా ఉన్నారు.

నటుడు సల్మాన్ ఖాన్ తన బీయింగ్ హ్యూమన్ స్వచ్ఛంద సంస్థ ద్వారా స్థానిక అభిమానులతో కలిసి నిశ్శబ్దంగా సహాయక చర్యలు చేపట్టారు.