గ్రహశకలం 1998 KY26: 10.7 నిమిషాల్లో ఒక భ్రమణం, 2031లో Hayabusa2 పరిశోధన

1998 KY26 అనే గ్రహశకలం కేవలం 10.7 నిమిషాల్లో ఒకసారి తన చుట్టూ తిరుగుతోంది. సాధారణంగా పెద్ద గ్రహశకలాలు ఒకసారి తిరగడానికి గంటలు లేదా రోజుల సమయం తీసుకుంటాయి. ఈ అసాధారణ భ్రమణ వేగమే శాస్త్రవేత్తల దృష్టిని దీనిపైకి తిప్పింది.

ఈ గ్రహశకలాన్ని 1998లో Spacewatch ప్రాజెక్ట్ ద్వారా ఖగోళ శాస్త్రవేత్తలు గుర్తించారు. భూమికి సమీపంగా తిరిగే Near Earth Objects జాబితాలో దీన్ని చేర్చారు. దీని పరిమాణం సుమారు 30 మీటర్లు. అంటే పది అంతస్తుల భవనం అంత మాత్రమే.

భౌతిక శాస్త్ర నియమాల ప్రకారం ఒక వస్తువు ఇంత వేగంగా తిరిగితే సెంట్రిఫ్యూగల్ ఫోర్స్ వల్ల ముక్కలు ముక్కలుగా విడిపోవాలి. కానీ 1998 KY26 మాత్రం చెక్కు చెదరకుండా తిరుగుతోంది. ఇది ఎలా సాధ్యమవుతోందనేది శాస్త్రవేత్తలకు ప్రశ్నగా మారింది.

ఈ గ్రహశకలం భూ వాతావరణంలోకి ప్రవేశిస్తే టంగ్స్కా ఘటన లాంటి నష్టం జరగవచ్చని అంచనాలు ఉన్నాయి. 1908లో రష్యాలోని టంగ్స్కా ప్రాంతంలో ఉల్క పడి దాదాపు 2,000 చదరపు కిలోమీటర్ల అడవి కాలిపోయింది. లక్షలాది చెట్లు నేలకూలాయి. గాలిలోనే పేలిపోతే వచ్చే శక్తి చిన్న అణుబాంబు పేలుడుకు సమానంగా ఉంటుందని అంచనా వేస్తున్నారు.

అయితే సమీప భవిష్యత్తులో ఇది భూమిని ఢీకొట్టే ప్రమాదం చాలా తక్కువని NASA స్పష్టం చేసింది. ఇది భూమి కక్ష్యకు సమీపంగా ప్రయాణించినా ప్రస్తుతానికి తక్షణ ముప్పు లేదని అంతరిక్ష సంస్థలు తెలిపాయి.

దీనిపై అధ్యయనం కోసం జపాన్ అంతరిక్ష సంస్థ JAXA కు చెందిన Hayabusa2 అంతరిక్ష నౌక ఈ గ్రహశకలం వైపు ప్రయాణిస్తోంది. 2031 నాటికి ఇది గ్రహశకలాన్ని చేరుకోనుంది. అక్కడ నీటి మంచు, కార్బన్, ఖనిజాలను అధ్యయనం చేస్తుంది. భవిష్యత్తులో మంగళ గ్రహ యాత్రలకు ఇది ఉపయోగపడవచ్చని శాస్త్రవేత్తలు భావిస్తున్నారు. 2031లో Hayabusa2 గ్రహశకలాన్ని చేరుకున్నాక దాని నిర్మాణంపై పూర్తి వివరాలు వెల్లడయ్యే అవకాశం ఉంది.