జూలై 31 నుంచి ఆగస్టు 2 వరకు బాల్టిమోర్‌లో అమెరికన్ తెలుగు అసోసియేషన్ 19వ మహాసభలు

అమెరికన్ తెలుగు అసోసియేషన్ (ATA) 19వ మహాసభలు జూలై 31 నుండి ఆగస్టు 2 వరకు అమెరికాలోని బాల్టిమోర్ నగరంలో జరగనున్నాయని ATA జాతీయ సమన్వయకర్త శరత్ వేముల తెలిపారు. ఈ సదస్సుకు సంబంధించి ప్రపంచవ్యాప్తంగా 50 దేశాల నుంచి సుమారు 1200 మంది ప్రతినిధులు, 150 మంది వీఐపీలు హాజరు కానున్నారు.

ఈ మూడు రోజుల మహాసభల్లో సాంస్కృతిక కార్యక్రమాలు, క్రికెట్, బ్యాడ్మింటన్, వాలీబాల్ వంటి క్రీడా పోటీలు, యువత, మహిళా సదస్సులు నిర్వహించనున్నారు. స్టార్టప్‌లకు ప్రోత్సాహం ఇచ్చే ‘బిజినెస్ బజ్’, ఆర్టిఫిషియల్ ఇంటెలిజెన్స్‌పై అవగాహన కార్యక్రమాలు, ఇమ్మిగ్రేషన్ న్యాయ నిపుణుల సహాయం వంటి సెషన్లు కూడా ఉంటాయి.

భారతదేశం నుంచి రాజకీయ, సినీ ప్రముఖులను ఆహ్వానించినట్లు శరత్ వేముల చెప్పారు. ఆంధ్రప్రదేశ్ ముఖ్యమంత్రి చంద్రబాబు నాయుడు, తెలంగాణ ముఖ్యమంత్రి రేవంత్ రెడ్డి, మాజీ ముఖ్యమంత్రి జగన్మోహన్ రెడ్డి, బీఆర్ఎస్ నేతలు కేటీఆర్, హరీశ్ రావు, బీజేపీ నేత కిషన్‌రెడ్డిలతో పాటు దర్శక-నిర్మాత దిల్ రాజు, నటీమణులు పూజా హెగ్డే, మీనాక్షి చౌదరి వంటి ప్రముఖులకు ఆహ్వానాలు పంపినట్లు తెలిపారు.

అమెరికాలోని మేరీల్యాండ్ గవర్నర్, లెఫ్టినెంట్ గవర్నర్లు, బాల్టిమోర్ మేయర్‌తో సహా స్థానిక ప్రజాప్రతినిధులు కూడా ఈ సమావేశానికి హాజరు కానున్నారు. తెలుగు ప్రజలందరినీ ఒకే వేదికపైకి తీసుకురావడమే ATA ప్రధాన లక్ష్యమని, ప్రపంచవ్యాప్త తెలుగు సమాజ అభివృద్ధికి సంఘం కృషి చేస్తుందని ఆయన అన్నారు.