అమెరికా తెలుగు అసోసియేషన్ మహాసభల్లో పరంపరా ఫౌండేషన్ శాస్త్రీయ నృత్య ప్రదర్శన

అమెరికా తెలుగు అసోసియేషన్ (ATA) 19వ మహాసభలు జూలై 31 నుంచి ఆగస్టు 2 వరకు అమెరికాలోని బాల్టిమోర్‌లో జరుగనున్నాయి. ఈ సభలలో పరంపరా ఫౌండేషన్ ప్రత్యేక సాంస్కృతిక ప్రదర్శన ఇవ్వనుంది.

ఫౌండేషన్ వ్యవస్థాపకుడు, కళా దర్శకుడు ప్రమోద్ రెడ్డి ఆధ్వర్యంలో రూపొందించిన ఈ ప్రదర్శనలో శాస్త్రీయ నృత్యం, సంగీతం, నాట్య రూపకాలు భారతీయ సంప్రదాయాలను ప్రతిబింబిస్తాయి. ప్రపంచవ్యాప్తంగా ఉన్న తెలుగు ప్రేక్షకులకు భారతీయ కళలను పరిచయం చేయడం ఈ ప్రదర్శన లక్ష్యం.

ప్రమోద్ రెడ్డి 12 మంది నృత్యకారులతో కలిసి అమెరికాలో పర్యటిస్తున్నారు. గత వారం షార్లెట్‌లో ఒక తెలుగు సంఘం కార్యక్రమంలో ప్రదర్శన ఇచ్చిన అనంతరం వారు బాల్టిమోర్ చేరుకున్నారు. పరంపరా ఫౌండేషన్ గత 10 ఏళ్లుగా దేవాలయాలు, వారసత్వ ప్రదేశాలలో 'గుడి సంబరాలు' పేరుతో సాంస్కృతిక కార్యక్రమాలు నిర్వహిస్తోంది. ఈ సారి ఆటా మహాసభల్లో కొత్త థీమ్‌తో ప్రదర్శన ఇవ్వనున్నట్లు ప్రమోద్ రెడ్డి తెలిపారు.