ఆగస్టు 1 నుంచి ధరల పెంపు: ఎఫ్ఎంసీజీ, ఎలక్ట్రానిక్స్, కార్ల ధరలు పెరగనున్నాయి

ఆగస్టు 1 నుంచి అనేక వస్తువుల ధరలు పెరగనున్నాయి. ఎఫ్ఎంసీజీ (FMGC) ఉత్పత్తులు, ఎలక్ట్రానిక్స్, ఆటోమొబైల్స్ ధరలపై ఈ ప్రభావం ఉంటుందని వ్యాపార వర్గాలు చెబుతున్నాయి.

ఆర్థిక నిపుణుల అంచనా ప్రకారం, నిత్యవసర వస్తువులైన టీ పొడి, హెయిర్ ఆయిల్, సబ్బులు, టూత్పేస్ట్, ప్యాకేజ్డ్ ఫుడ్స్ వంటి ఎఫ్ఎంసీజీ ఉత్పత్తుల ధరలు 6-8 శాతం వరకు పెరిగే అవకాశం ఉంది. ఇంధన ధరలు, రవాణా ఖర్చులు పెరగడం ఇందుకు కారణమని వారు తెలిపారు. దీనివల్ల కుటుంబాల నెలవారీ ఖర్చు మరింత పెరుగుతుందని హెచ్చరిస్తున్నారు.

ఎలక్ట్రానిక్స్ రంగంలో రిఫ్రిజిరేటర్లు, వాషింగ్ మెషీన్లు, టెలివిజన్ల ధరలు 4-6 శాతం పెరగొచ్చని వ్యాపారులు అంటున్నారు. అంతర్జాతీయ మార్కెట్లో మెమరీ చిప్‌ల ధరలు పెరగడంతో స్మార్ట్‌ఫోన్ల ధరలపై ప్రభావం పడవచ్చు. ఆటోమొబైల్ రంగంలో మారుతీ సుజుకీ కొన్ని మోడళ్లపై రూ.30,000 వరకు ధరలు పెంచింది. హోండా, ఇతర సంస్థలు కూడా త్వరలో ధరలను పెంచే అవకాశం ఉందని మార్కెట్ వర్గాలు చెబుతున్నాయి.

పెరుగుతున్న ధరలపై పలువురు దుకాణదారులు, వినియోగదారులు ఆందోళన వ్యక్తం చేశారు. ముడి సరుకు కొరత, అంతర్జాతీయ సంఘర్షణలు ధరల పెరుగుదలకు కారణమని వారు పేర్కొంటున్నారు. ధరల నియంత్రణకు ప్రభుత్వం చొరవ తీసుకోవాలని కొంతమంది కోరుతున్నారు. ఈ విషయంలో ప్రభుత్వం నుంచి ఎలాంటి ప్రకటన రాలేదు.