అయోధ్య రామ మందిరంలో విరాళాల భద్రతకు కొత్త నిబంధనలు: 360 డిగ్రీ కెమెరాలు, మానిటరింగ్ టీమ్

శ్రీ రామ జన్మభూమి తీర్థ క్షేత్ర ట్రస్ట్ అయోధ్య రామ మందిరంలో విరాళాల సేకరణ, లెక్కింపు ప్రక్రియపై కఠిన నిఘా ఏర్పాటు చేయాలని నిర్ణయించింది. ఈ మేరకు కొత్త భద్రతా నిబంధనలను ఈ నెల 25 నుంచి అమలు చేస్తున్నట్లు ట్రస్ట్ స్పష్టం చేసింది.

ట్రస్ట్ ఆదేశాల ప్రకారం విరాళాల సేకరణ, లెక్కింపు మొత్తం 360 డిగ్రీ కెమెరాలతో నిరంతరం వీడియో రికార్డింగ్ చేయాలి. ఖాళీ హుండీ పెట్టలు తీసుకెళ్లడం, విరాళాలు సేకరించడం, సీల్ వేసి రవాణా చేయడం వంటి ప్రతి దశా కెమెరా నిఘాలో ఉండేలా చర్యలు తీసుకున్నారు. ఇందుకోసం ఇద్దరు ప్రొఫెషనల్ వీడియోగ్రాఫర్లను నియమించనున్నట్లు ట్రస్ట్ పేర్కొంది.

అదనపు భద్రత కోసం బ్యాంక్ ఉద్యోగులు, ట్రస్ట్ ప్రతినిధులు, ప్రైవేట్ సెక్యూరిటీతో కూడిన ఎనిమిది మంది సభ్యుల మానిటరింగ్ టీమ్ ఏర్పాటు చేస్తున్నారు. ఆలయంలోని 40 విరాళాల పెట్టలను ఒకేసారి కాకుండా రోజువారీగా ఖాళీ చేసే విధానం అమలు చేస్తున్నారు. హుండీ పెట్టలను లెక్కింపు గదికి చేర్చిన అనంతరం స్టేట్ బ్యాంక్ ఆఫ్ ఇండియా అధికారులు సీల్ వేస్తారని ట్రస్ట్ తెలిపింది.

విరాళాల దొంగతనం ఆరోపణలు, ఎస్ఐటీ విచారణ నేపథ్యంలో ఈ కఠిన చర్యలు తీసుకున్నట్లు ట్రస్ట్ వెల్లడించింది. ట్రస్ట్ ప్రకటన ప్రకారం కొత్త భద్రతా నిబంధనలు తక్షణమే అమల్లోకి వచ్చాయి.