అయోధ్య ఆలయ విరాళాల కేసు: దొంగిలించిన ఆభరణాలు కరిగించి ఉండొచ్చని అనుమానం

అయోధ్య రామాలయం విరాళాల దుర్వినియోగం ఆరోపణల కేసులో దర్యాప్తు బృందాలు కొత్త కోణంలో విచారణ జరుపుతున్నాయి. దొంగిలించిన బంగారం, వెండి ఆభరణాలను కరిగించి బిస్కెట్లుగా మార్చి ఉండొచ్చనే అనుమానంతో పోలీసులు దర్యాప్తు చేస్తున్నారు.

పలుమార్లు సోదాలు నిర్వహించినా మిస్సింగ్ ఆభరణాలు లభ్యం కాకపోవడంతో ఈ అనుమానం బలపడిందని అధికారులు భావిస్తున్నారు. ఈ కేసులో ఆలయ ఇంచార్జ్ కేడి బాబును సిట్ అధికారులు ప్రశ్నించారు. దేవుడి ఆభరణాల నిల్వ, భద్రత, బ్యాంకు లావాదేవీల వివరాలు సేకరించారు.

మరో కీలకాంశం ఏమిటంటే, ట్రస్ట్ త్రైమాసిక సమావేశాల్లో నగదు విరాళాలు, ఆదాయంపై సమీక్ష జరిగినా, బంగారం, వెండి, ఇతర విలువైన ఆభరణాల విలువ, నిల్వల గురించి చర్చించినట్లు సమాచారం లేదు.

ట్రస్ట్ తొలిదశలో 944 కిలోల వెండి విరాళాన్ని నాణ్యత పరీక్షల నిమిత్తం మింటికి పంపింది. మాజీ ప్రధాన కార్యదర్శి చంపరాయ్ గతంలో తెలిపిన ప్రకారం, ఆలయానికి సుమారు 13 క్వింటాళ్ల వెండి, 20 కిలోల బంగారం విరాళంగా వచ్చాయి.

ఈ కేసులో ఇప్పటివరకు ఎనిమిది మందిని అరెస్టు చేశారు. కాంగ్రెస్ పార్టీ విరాళాలపై పూర్తి లెక్కలు చెప్పాలని డిమాండ్ చేయగా, ఆర్‌ఎస్‌ఎస్ నిందితులపై కఠిన చర్యలు తీసుకోవాలని కోరింది.