నడుము నొప్పి, మెడ నొప్పి, తల నొప్పి వస్తున్నాయా? న్యూరో సర్జన్ డాక్టర్ బాల రాజశేఖర్ ఇచ్చిన జాగ్రత్తలు

నడుము నొప్పి, మెడ నొప్పి, తల నొప్పి సమస్యలు ఇప్పుడు అన్ని వయసుల వారిలో కనిపిస్తున్నాయని యశోదా హాస్పిటల్స్ సీనియర్ న్యూరో సర్జన్ డాక్టర్ బాల రాజశేఖర్ తెలిపారు. ప్రత్యేకించి యువత, సాఫ్ట్‌వేర్ ఉద్యోగులు, విద్యార్థులు ఎక్కువగా ఈ నొప్పులతో బాధపడుతున్నారని ఆయన వివరించారు.

డాక్టర్ రాజశేఖర్ మాట్లాడుతూ, చిన్నతనంలో శారీరక శ్రమ లేకపోవడం, ఎక్కువసేపు కంప్యూటర్ ముందు కూర్చోవడం, సరైన వ్యాయామం చేయకపోవడం వల్ల ఎముకలు, కండరాల బలం తగ్గుతుందన్నారు. ఆహారంలో జంక్ ఫుడ్ ఎక్కువై పోషకాలు తక్కువ కావడం కూడా నడుము నొప్పికి ప్రధాన కారణమని ఆయన తెలిపారు.

నడుము నొప్పితో పాటు కాళ్లలో తిమ్మిర్లు, నడవలేకపోవడం, చేతుల్లో బలహీనత, మూత్రం ఆగిపోవడం వంటి లక్షణాలు కనిపిస్తే వెంటనే న్యూరో సర్జన్‌ను సంప్రదించాలని డాక్టర్ రాజశేఖర్ హెచ్చరించారు. ఇవి నరాలపై ఒత్తిడి వల్ల వచ్చే ప్రమాద సూచికలని ఆయన పేర్కొన్నారు.

సమస్య నిర్ధారణకు ముందుగా క్లినికల్ ఎగ్జామినేషన్, అవసరమైతే ఎంఆర్ఐ, ఎక్స్‌రే పరీక్షలు చేస్తామన్నారు. చాలావరకు మందులు, ఫిజియోథెరపీతో నొప్పి తగ్గుతుందని, నాన్‌-సర్జికల్ విధానాలు పని చేయని సందర్భాల్లో మాత్రమే సర్జరీ సూచిస్తామని వివరించారు.

ప్రస్తుతం ఎండోస్కోపిక్ సర్జరీ ద్వారా చిన్న రంధ్రాలతో ఆపరేషన్ చేసి, త్వరగా డిశ్చార్జ్ చేస్తామని డాక్టర్ రాజశేఖర్ తెలిపారు. ఈ విధానంలో కండరాలకు నష్టం తక్కువై, రోగి మరుసటి రోజు నుంచే తన పనులు తాను చేసుకోగలుగుతారని అన్నారు. దీర్ఘకాలం పడుకోవాల్సిన అవసరం లేదని, చాలా మందిలో స్క్రూలు, రాడ్‌లు వేయనవసరం లేదని చెప్పారు.