బ్యాంకు ఉద్యోగుల మూడు రోజుల సమ్మె వాయిదా; బ్యాంకులు యథావిధిగా పనిచేయనున్నాయి

బ్యాంకు ఉద్యోగ సంఘాలు ఈ రోజు నుంచి చేపట్టాల్సిన మూడు రోజుల సమ్మెను వాయిదా వేశాయి. దీంతో దేశవ్యాప్తంగా బ్యాంకులు యథావిధిగా పనిచేయనున్నాయి.

ఆదివారం రాత్రి ఇండియన్ బ్యాంక్స్ అసోసియేషన్ (IBA), యునైటెడ్ ఫోరం ఆఫ్ బ్యాంక్ యూనియన్స్ (UFBU) మధ్య జరిగిన చర్చలు ఫలించాయి. చర్చల అనంతరం సమ్మెను వాయిదా వేస్తున్నట్లు UFBU ప్రకటించింది. ఐదు రోజుల పని దినాలపై రెండు సంఘాల ప్రతినిధులతో కూడిన ఉన్నత స్థాయి కమిటీని ఏర్పాటు చేయాలని నిర్ణయించారు.

బ్యాంకు ఉద్యోగుల ప్రధాన డిమాండ్లలో వారానికి ఐదు రోజుల పని విధానం, రెండు రోజుల సెలవు, సిబ్బంది పెంపు ఉన్నాయి. Scale 4 మరియు అంతకంటే పై అధికారులకు సంబంధించిన PLI పథకంలో మార్పులపై ప్రతిపాదనలు రూపొందించి ప్రభుత్వానికి పంపనున్నట్లు తెలిపారు. మిగిలిన అంశాలపై త్వరలో చర్చలు జరుగుతాయని యూనియన్ నేతలు ప్రకటించారు.

శనివారం సెలవు అంశంపై ఇంకా తుది నిర్ణయం రాలేదు. దీనిని పరిశీలించేందుకు ఉన్నత స్థాయి కమిటీ ఏర్పాటు కానుంది. కమిటీ నిర్ణయం వచ్చే వరకు బ్యాంకింగ్ సేవలు సాధారణంగా కొనసాగుతాయి.