నల్సార్ లా విద్యార్థులకు బార్ కౌన్సిల్ ఆఫ్ ఇండియా క్షమాపణ లేఖ

బార్ కౌన్సిల్ ఆఫ్ ఇండియా నల్సార్ లా విద్యార్థులకు క్షమాపణలు చెప్పింది. ఈ మేరకు ఒక లేఖ విడుదల చేసింది.

నల్సార్ 2026 బ్యాచ్ విద్యార్థులను అడ్వకేట్లుగా నమోదు చేయవద్దని BCI ఇంతకుముందు రాష్ట్ర బార్ కౌన్సిల్స్‌కు ఆదేశాలు జారీ చేసింది. ఈ నిర్ణయంపై తీవ్ర వ్యతిరేకత రావడంతో కొద్ది గంటల్లోనే ఆ నిషేధాన్ని వెనక్కి తీసుకుంది. ఆ తర్వాత విద్యార్థులకు క్షమాపణలు చెప్పింది.

BCI చైర్మన్ మనన్ కుమార్ మిశ్రా మాట్లాడుతూ విద్యార్థుల మనోభావాలు దెబ్బతిన్నందుకు విచారం వ్యక్తం చేశారు. నల్సార్ యూనివర్సిటీ కాన్వొకేషన్‌కు జస్టిస్ సూర్యకాంత్‌ను ముఖ్య అతిథిగా ఆహ్వానించడాన్ని నిరసిస్తూ విద్యార్థులు ఆందోళన చేపట్టారు. ఈ నేపథ్యంలోనే BCI ఆదేశాలు జారీ చేసింది.

సుప్రీంకోర్టు ప్రధాన న్యాయమూర్తి జస్టిస్ సూర్యకాంత్ స్పందిస్తూ విద్యార్థులు తప్పు చేసినా నిరసన తెలిపే హక్కు వారికి ఉందని అన్నారు. ఈ అంశంలో BCI జోక్యం అనవసరమని వ్యాఖ్యానించారు. సామాజిక అంశాలపై యువతకు ఉన్న అవగాహనను ఆయన ప్రశంసించారు.