వనస్థలిపురం ఇంటి దొంగతనం కేసు ఛేదన: నలుగురు అరెస్ట్, ₹50 లక్షల ఆభరణాలు స్వాధీనం

హైదరాబాద్‌లోని వనస్థలిపురం పోలీస్ స్టేషన్ పరిధిలో జరిగిన ఇంటి దొంగతనం కేసును పోలీసులు ఛేదించారు. నలుగురు నిందితులను అరెస్టు చేశారు.

వారి నుంచి ₹50 లక్షల విలువైన బంగారం, వజ్రాలు, వెండి ఆభరణాలు, నగదును స్వాధీనం చేసుకున్నారు. దీపావళి రోజున సచివాలయ నగర్‌లో నివసించే వికాస్ కుమార్ అగర్వాల్ కుటుంబం బయటకు వెళ్లింది. తాళం వేసిన ఇంటిని లక్ష్యంగా చేసుకుని నిందితులు చోరీకి పాల్పడ్డారు.

సాయంత్రం 6:30 నుంచి 8:30 మధ్య ఇంట్లోకి చొరబడి బీరువాలు తెరిచి బంగారం, నగదు తీసుకెళ్లినట్లు పోలీసులు తెలిపారు. విశ్వసనీయ సమాచారం ఆధారంగా ఆటో నగర్ ప్రాంతంలో నలుగురిని అదుపులోకి తీసుకుని విచారించగా వివరాలు బయటపడ్డాయి.

నిందితుల నుంచి 21 తులాల బంగారం, 15 గ్రాముల డైమండ్ నెక్లెస్, 54 తులాల వెండి ఆభరణాలు, ₹9 లక్షల నగదు రికవరీ అయింది. నలుగురూ తొలిసారి దొంగతనం చేసిన వారని పోలీసులు తెలిపారు.

ఇన్‌స్పెక్టర్ రవికుమార్, DI రాజేష్ నేతృత్వంలోని బృందం CCTV ఫుటేజీ, వివిధ ఆధారాలను సేకరించి నిందితులను పట్టుకుంది. అరెస్టు సొత్తును రికవరీ చేసి, నిందితులను రిమాండ్‌కు తరలించినట్లు ACP కరుణాకర్ రావు తెలిపారు.