లోతైన సముద్ర కార్యకలాపాల కోసం AI అండర్‍వాటర్ రోబోటిక్ ఆర్మ్‌ను ప్రదర్శించిన చైనా

షెన్జెన్‌లో జరుగుతున్న APEC (Asia-Pacific Economic Cooperation) సదస్సులో చైనా తన తాజా AI ఆధారిత అండర్‌వాటర్ రోబోటిక్ ఆర్మ్‌ను ప్రదర్శనకు పెట్టింది. లోతైన సముద్ర కార్యకలాపాలకు ఇది అత్యాధునిక సాంకేతికత అని చైనా చెబుతోంది.

ఈ రోబోటిక్ ఆర్మ్‌లో నాలుగు మోటార్లు, ముందు భాగంలో ఒక క్లా ఉంది. బరువు సుమారు 12 కిలోలు. AI సాయంతో ఇది నీటి అడుగున 350 మీటర్ల లోతు వరకు వెళ్లగలదు. అక్కడ తీసిన చిత్రాలను రియల్ టైమ్‌లో పైకి పంపుతుంది. దారిలో అడ్డంకులు ఎదురైతే వాటిని గుర్తించి, పక్కకు తిరిగి వెళ్లేలా AIకి శిక్షణ ఇచ్చారు. చిక్కుకుపోయిన వస్తువులను ముందున్న క్లా సాయంతో బయటకు తీసుకురావచ్చు.

ఈ ఆర్మ్‌కు రకరకాల ఉపయోగాలున్నాయి. వాణిజ్య కార్యకలాపాలతో పాటు, నీటి అడుగున షూటింగ్‌కు వాడే కెమెరాలకూ ఇది ఉపయోగపడుతుంది. డైవింగ్‌కు దిగే ముందు డైవర్లు ఈ ఆర్మ్‌ను ముందుగా పంపి, అక్కడి పరిస్థితిని చిత్రీకరించి, ఆ తర్వాతే నీటిలోకి దిగుతారు. వృత్తిపరమైన పనుల్లోనూ దీన్ని వాడొచ్చు.

ధర విషయానికి వస్తే, ఇంతకుముందు వచ్చిన వెర్షన్ ధర సుమారు 12,000 RMB. దాన్ని మూడు రెట్లు లెక్కిస్తే భారత కరెన్సీలో దాదాపు ₹36,000 అవుతుంది. ఇప్పుడు ప్రదర్శిస్తున్న మోడల్ మాత్రం చాలా ఖరీదైనది. రోబోటిక్స్, AI సాంకేతికత వేగంగా మారుతుండటంతో ధరలు స్థిరంగా ఉండవని అక్కడి శాస్త్రవేత్తలు చెబుతున్నారు.

APEC సదస్సులో చైనా తన అత్యాధునిక రోబోటిక్స్, AI ఉత్పత్తులను ప్రపంచానికి ప్రదర్శిస్తోంది. షెన్జెన్‌లోని ప్రదర్శనశాల నుంచి India Today బృందం ఈ టెక్నాలజీని ప్రత్యక్షంగా పరిశీలించి వివరాలు నివేదించింది.