పండుగ సీజన్‌లో 52 టన్నుల బంగారం అమ్మకం: ₹72,000 కోట్ల వ్యాపారం

ధనత్రయోదశి, దీపావళి పండుగ సీజన్‌లో దేశవ్యాప్తంగా 52 టన్నుల బంగారం అమ్ముడైంది. ఈ అమ్మకాల విలువ ₹72,000 కోట్లు ఉంటుందని ఇండియా బులియన్ అండ్ జువెలర్స్ అసోషియేషన్ (IBJA) తెలిపింది.

బంగారం ధర గరిష్ట స్థాయి నుంచి 21 శాతం తగ్గడం కొనుగోలుదారులను ఆకర్షించింది. ఢిల్లీలో శుక్రవారం 10 గ్రాముల బంగారం ధర ₹2,500 తగ్గి ₹1,40,900కి చేరింది. గురువారం అదే ధర ₹1,43,400గా ఉంది. వరుసగా నాలుగో రోజు కూడా బంగారం ధర తగ్గింది. వెండి ధర కూడా కిలోపై ₹3,500 తగ్గింది.

గతేడాదితో పోలిస్తే ధరలు ఎక్కువగా ఉన్నా, పండుగ సంప్రదాయాలు, వివాహ సీజన్ కారణంగా కొనుగోళ్లు పెరిగాయి. కొనుగోలుదారుల అభిరుచి కూడా మారుతోంది. గతంలో 30 నుంచి 40 గ్రాముల హారాలను కొనేవారు. ఇప్పుడు 12 నుంచి 13 గ్రాముల తేలికపాటి ఆభరణాలను ఎంచుకుంటున్నారు. 18 క్యారెట్ బంగారంతో చేసిన 3 నుంచి 4 గ్రాముల బ్రేస్‌లెట్లకు, చిన్న బంగారు నాణేలకు డిమాండ్ పెరిగింది.

జాయ్ అలుక్కాస్ సంస్థ అమ్మకాలు 25 శాతం పెరిగాయని ఆ సంస్థ CMD తెలిపారు. సెన్‌కో గోల్డ్ కూడా 25 శాతానికి పైగా వృద్ధి నమోదు చేసినట్లు తెలిపింది.

నవంబర్ 20 నుంచి వివాహ సీజన్ ప్రారంభం కానుండటంతో నగల కొనుగోళ్లు పెరుగుతున్నాయి. అంతర్జాతీయ మార్కెట్‌లో బలహీనత, అమెరికా డాలర్ బలపడటం, ప్రభుత్వ బాండ్లపై రాబడి పెరగడం ధరలపై ప్రభావం చూపుతున్నాయని మార్కెట్ విశ్లేషకులు చెప్తున్నారు.