నిడదవోలులో భారీ వర్షాల పంట నష్టంపై కేంద్ర నిపుణుల బృందం పరిశీలన

తూర్పు గోదావరి జిల్లా నిడదవోలు నియోజకవర్గంలో భారీ వర్షాలతో నష్టపోయిన పంట ప్రాంతాలను కేంద్ర నిపుణుల బృందం సందర్శించింది.

కేంద్ర గ్రామీణ అభివృద్ధి మంత్రిత్వ శాఖ డిప్యూటీ సెక్రెటరీ అలోక్ జవహర్ నేతృత్వంలో ఈ బృందం పర్యటించింది. ఏపీ రాష్ట్ర విపత్తుల నిర్వహణ శాఖ ఎగ్జిక్యూటివ్ డైరెక్టర్ కౌసర్ భాను, స్థానిక డివిజనల్ రెవెన్యూ అధికారులు బృందంతో పాటు ఉన్నారు.

బృందం సింగవరం, కంసాలిపాలం, రాబిమెట్ల, తీరుగూడెం తదితర గ్రామాల్లో వరి పంట నష్టాన్ని పరిశీలించింది. రైతులతో మాట్లాడి నష్టపోయిన వారి వివరాలను అడిగి తెలుసుకుంది.

నష్టపోయిన పంటకు ఆర్థిక సహాయం అందిస్తే తప్ప వచ్చే పంటకు కనీసం నాట్లు వేసే పరిస్థితి లేదని రైతులు బృందానికి తెలిపారు.

రెవెన్యూ అధికారులకు బృందం పలు సూచనలు చేసింది. నష్టపోయిన భూములను సెక్టార్ వారీగా పరిశీలించి పంట నష్టాన్ని అంచనా వేయాలని సూచించింది. పంట నష్టం విలువను నివేదికలో పొందుపరచాలని ఆదేశించింది.

రైతులు ఏదైనా రైతు సంక్షేమ పథకం ద్వారా సబ్సిడీ పొంది ఉంటే దాన్ని మినహాయించి నష్టాన్ని అంచనా వేయాలని బృందం వివరించింది.