ఉజ్జైని బోనాల జాతరలో భారత్ స్కౌట్స్ & గైడ్స్ సేవలు

సికింద్రాబాద్‌లోని ఉజ్జైని మహంకాళి అమ్మవారి బోనాల జాత్ర ఘనంగా జరుగుతోంది. ఈ జాతరలో భక్తుల రద్దీ నిర్వహణకు భారత్ స్కౌట్స్ అండ్ గైడ్స్ స్వచ్ఛంద సేవలు అందిస్తున్నాయి.

మొత్తం 150 మంది స్కౌట్స్ & గైడ్స్ వాలంటీర్లు ఉదయం 5 నుంచి రాత్రి 9 గంటల వరకు సేవల్లో పాల్గొంటున్నారు. వీరు భక్తులను లైన్లలో నియంత్రించడం, బోనాలు మోసుకొచ్చే భక్తులను సాధారణ దర్శనార్థుల నుంచి వేరు చేయడం వంటి బాధ్యతలు నిర్వహిస్తున్నారు.

ఈ సేవల గురించి వాలంటీర్ గ్రీష్మ చంద్రిక మాట్లాడుతూ, 'నేను 8 సంవత్సరాలుగా ఈ సేవలో పాల్గొంటున్నాను. కాలేజీలో స్కౌట్స్‌లో చేరినప్పటి నుండి ప్రతి ఏటా వస్తున్నాను. మా స్కౌట్స్ సంస్థ మహంకాళి ఆలయంతో కలిసి పనిచేస్తోంది. ఇక్కడ క్రౌడ్ మేనేజ్‌మెంట్ చేయడం, భక్తుల నుంచి చికాకు వచ్చినా సహనంతో వ్యవహరించడం చాలా ముఖ్యం' అని చెప్పారు.

మరో వాలంటీర్ ప్రశాంతి మాట్లాడుతూ, 'రెండోసారి ఈ సేవలో పాల్గొంటున్నాను. లైన్ ఏర్పాట్లు, తాగి వచ్చే భక్తులతో వ్యవహరించడం కొన్ని సార్లు కష్టంగా ఉన్నా, దైవ సేవగా భావించి ఓపికతో పనిచేస్తున్నాం' అని తెలిపారు.

80 సంవత్సరాలుగా ఎన్సీసీ, స్కౌట్స్ & గైడ్స్ సంస్థలు ఉజ్జైని బోనాల జాతరలో స్వచ్ఛంద సేవలు అందిస్తున్నాయని నిర్వాహకులు చెబుతున్నారు. పోలీసులు కూడా భారీ బందోబస్తు కల్పించారు. ఈ ఏడాది కూడా భక్తులకు సౌకర్యంగా దర్శనం కల్పించేందుకు వీరి సేవలు ఉపకరిస్తున్నాయి.