దేవాదుల ప్రాజెక్ట్ పరిశీలనకు నేడు డిప్యూటీ సీఎం భట్టి, మంత్రి ఉత్తమ్ రాక

తెలంగాణ ఉప ముఖ్యమంత్రి భట్టి విక్రమార్క, రాష్ట్ర మంత్రి ఉత్తమ్ కుమార్ రెడ్డి నేడు దేవాదుల ఎత్తిపోతల ప్రాజెక్టును పరిశీలించనున్నారు. ఉదయం 10 గంటలకు ప్రాజెక్ట్ వద్దకు చేరుకుని, దేవాదుల ఆఫ్టేక్ పాయింట్ పంపింగ్ స్టేషన్ను సందర్శిస్తారు.

అనంతరం ప్రాజెక్ట్ పనులు, నీటి సరఫరాపై అధికారులతో సమీక్ష నిర్వహిస్తారు. ఈ సందర్భంగా పంపుల నిర్వహణ, కొనసాగుతున్న పనుల ప్రగతిపై చర్చించనున్నారు.

సమీక్ష తర్వాత ఉదయం 11:30 గంటలకు హెలికాప్టర్‌లో భద్రాద్రి కొత్తగూడెం జిల్లాలోని సీతారామ ప్రాజెక్టుకు బయలుదేరుతారు. అక్కడ సీతమ్మ సాగర్ను సందర్శించి, పరిస్థితిని తెలుసుకుంటారు.

దేవాదుల ఎత్తిపోతల ప్రాజెక్ట్ ములుగు జిల్లా కన్నాయిగూడెం మండలంలో మూడు ఫేజులుగా నిర్మిస్తున్నారు. 20 ఏళ్ల కిందట ప్రారంభమైన ఈ ప్రాజెక్ట్‌లో 20 పంప్‌హౌస్‌లు, 22 రిజర్వాయర్లు ఉన్నాయి. 16 ప్యాకేజీలుగా చేపట్టిన పనులు ప్రస్తుతం 80% పూర్తయ్యాయి.

6 లక్షల ఎకరాలకు సాగునీరు అందించే లక్ష్యంతో నిర్మిస్తున్న ఈ ప్రాజెక్ట్ కింద ఇప్పటికే 3.5 లక్షల ఎకరాలకు నీరు అందుతోంది. మిగిలిన 20% పనులు పూర్తయితే ములుగు, వరంగల్, హనుమకొండ, భూపాలపల్లి, జనగామ, యాదాద్రి భువనగిరి, సిద్దిపేట జిల్లాల్లోని ఆయకట్టుకు నీరు అందనుంది.

వర్షాభావం కారణంగా ఈ ప్రాంతంలో పంటలకు నీటి కొరత ఏర్పడింది. ఈ నేపథ్యంలో ఈ నెల 1వ తేదీ నుంచి దేవాదుల పంప్‌హౌస్‌లోని 10 పంపుల్లో 7 పంపులను నడిపి నీటిని ఎత్తిపోస్తున్నారు. ఈ నెల 15వ తేదీ నాటికి సంబంధిత జలాశయాలు పూర్తిగా నిండుతాయని అధికారులు తెలిపారు.

7 జిల్లాల్లోని 17 శాసనసభ నియోజకవర్గాల్లో సాగునీటిని అందించేందుకు ప్రభుత్వం ఈ చర్యలు తీసుకుంటోంది. మంత్రుల పర్యటనలో ప్రాజెక్ట్ పనులను వేగవంతం చేసే అంశంపై నిర్ణయాలు తీసుకునే అవకాశం ఉంది.