విశాఖ ప్రాంతానికి అంతర్జాతీయ కనెక్టివిటీ తీసుకురానున్న భోగాపురం విమానాశ్రయం

విశాఖపట్నంలో ప్రస్తుతం అంతర్జాతీయ విమానాలు నేరుగా ల్యాండ్ కాలేవు. ఈ లోటును భోగాపురం వద్ద నిర్మిస్తున్న అంతర్జాతీయ ప్రమాణాల విమానాశ్రయం తీర్చనుంది.

భోగాపురం ఎయిర్‌పోర్ట్‌లో 5,000 చదరపు అడుగుల ఏరియాలో 25,000 మెట్రిక్ టన్నుల సరుకు రవాణా సామర్థ్యంతో కార్గో టెర్మినల్ నిర్మించారు. ఫార్మా, సముద్ర ఉత్పత్తులు, త్వరగా పాడైపోయే వస్తువుల కోసం టెంపరేచర్-కంట్రోల్డ్ కోల్డ్ చైన్ సౌకర్యం కూడా ఏర్పాటు చేశారు. లాజిస్టిక్స్ పార్క్ రావడంతో ఈ ప్రాంతం ఎగుమతులకు అనుకూలంగా మారనుంది.

ఐటీ సంస్థల విదేశీ క్లయింట్లు నేరుగా ఇక్కడికి రావచ్చు. దీంతో ప్రపంచ స్థాయి టెక్ కంపెనీలు క్యాంపస్‌లు ఏర్పాటు చేసే అవకాశం ఉంది. డేటా సెంటర్లు వంటి ప్రాజెక్ట్‌లతో వేలాది మంది స్థానిక యువతకు ఉద్యోగాలు లభిస్తాయని అంచనా.

విమానాశ్రయం చుట్టూ ఏరోసిటీగా వాణిజ్య సముదాయాలు, కన్వెన్షన్ సెంటర్లు, షాపింగ్ మాల్స్ ఏర్పాటు చేస్తారు. 500 ఎకరాల్లో ఏవియేషన్ హబ్, 136 ఎకరాల్లో ఏవియేషన్ ఎడ్యుసిటీ రానుంది. ఈ ప్రాజెక్ట్ వల్ల రూ.25,000 కోట్ల పెట్టుబడులు వచ్చి లక్షల మందికి ఉపాధి లభించే అవకాశం ఉందని అధికారులు తెలిపారు.

ఈ ఎయిర్‌పోర్ట్ విశాఖ, విజయనగరం, శ్రీకాకుళం జిల్లాలకు దగ్గరగా ఉండడంతో ఆహార శుద్ధి, ప్యాకేజింగ్ పరిశ్రమలు, పర్యాటక రంగం వంటి రంగాలు కూడా అభివృద్ధి చెందే వీలుంది. విమానాశ్రయం పనులు చురుగ్గా కొనసాగుతున్నాయి.