బీహార్: ఎనిమిది నెలల జీతం రాకపోవడంతో అధికారి కార్యాలయం ఎదుట భిక్షాటన

బీహార్‌లోని బక్సర్ జిల్లాలో ఒక మహిళా అధికారి తన కార్యాలయం ఎదుట భిక్ష పాత్రతో కూర్చుని నిరసన తెలిపారు. ఎనిమిది నెలలుగా ఆమెకు జీతం రాలేదు. ఆమె పేరు అల్పిత సింగ్. బ్రహ్మపూర్ బ్లాక్ కార్యాలయంలో రూరల్ డెవలప్‌మెంట్ ఆఫీసర్‌గా విధులు నిర్వహిస్తున్నారు.

ఆమె కార్యాలయంలో చేరి 11 నెలలు అవుతోంది. మొదటి మూడు నెలలు మాత్రమే క్రమంగా జీతం అందింది. ఆ తర్వాత ఎనిమిది నెలలుగా శాలరీ ఇవ్వలేదు. జీతం రాకపోయినా ఆమె ప్రతిరోజూ విధులకు హాజరై బాధ్యతలు నిర్వర్తించారు.

జీతం పొందేందుకు ఆమె పలుమార్లు అధికారులకు ఫిర్యాదు చేశారు. ఫలితం లేకపోవడంతో ఈ మార్గాన్ని ఎంచుకున్నారు. ఈ ఘటనకు సంబంధించిన ఫోటోలు, వీడియోలు సోషల్ మీడియాలో వైరల్ అవుతున్నాయి.

ఘటన తర్వాత జిల్లా యంత్రాంగం ప్రాథమిక విచారణ చేపట్టింది. బ్రహ్మపూర్ BDO, ఆమె మధ్య పరిపాలనా పరమైన విభేదాలు ఉన్నట్టు విచారణలో గుర్తించినట్టు తెలుస్తోంది. జీతం ఎందుకు నిలిపివేశారని వివరణ కోరుతూ సంబంధిత అధికారులకు నోటీసులు ఇచ్చినట్టు సమాచారం.

జీతం చెల్లింపుపై అధికారుల స్పష్టమైన ప్రకటన ఇంకా రాలేదు. విచారణ ఫలితం ఆధారంగా తదుపరి చర్యలు ఉంటాయని భావిస్తున్నారు.