హైదరాబాద్ అండాల రాకెట్: ఓయాసిస్ ఫెర్టిలిటీ నిర్వాహకులపై మరో ఐదు కేసులు నమోదు

హైదరాబాద్ అండాల సేకరణ రాకెట్ కేసులో మరో ఐదు కేసులు నమోదయ్యాయి. సద్గురు హెల్త్ కేర్ సర్వీసెస్, ఓయాసిస్ ఫెర్టిలిటీ క్లినిక్స్ నిర్వాహకులపై ఈ కొత్త ఎఫ్ఐఆర్లు నమోదు చేసినట్టు పోలీసులు తెలిపారు.

కంపెనీ డైరెక్టర్, ఎండీ దుర్గారావు, డోనర్ ఫెసిలిటేటర్లు అమిత్ శర్మ, నికిత ఫర్వీన్, దీపిక తదితరులపై కేసులు నమోదు చేశారు. మదీనాగూడలో ప్రధాన కార్యాలయం ఉన్న ఓయాసిస్ ఫెర్టిలిటీ బ్రాండ్ పేరుతో 10 రాష్ట్రాల్లో 46 క్లినిక్‌లు నిర్వహిస్తున్నట్టు పోలీసులు గుర్తించారు.

జనవరి నుంచి ఇప్పటివరకు నిబంధనలకు విరుద్ధంగా 66 మంది మహిళల నుంచి అండాలను సేకరించినట్టు దర్యాప్తులో బయటపడింది. బెంగాల్, యూపీ, బీహార్, మహారాష్ట్ర, ఛత్తీస్‌గఢ్ రాష్ట్రాల మహిళలకు ₹50,000 ఆశ చూపి హైదరాబాద్‌కు తీసుకొచ్చినట్టు పోలీసులు చెప్తున్నారు.

బేగంపేటలోని ఓ మహిళా హాస్పిటల్‌పై పోలీసు, ఆరోగ్య శాఖ అధికారుల సంయుక్త తనిఖీల్లో 12 మంది బాధిత మహిళలను విముక్తి చేశారు. వైద్యుల పర్యవేక్షణ లేకుండా హార్మోన్ ఇంజెక్షన్లు ఇచ్చినట్టు, బయోమెడికల్ వ్యర్థాల నిబంధనలు ఉల్లంఘించినట్టు ఆరోపణలు ఉన్నాయి.

ఒక మహిళను తీసుకొస్తే ఫెసిలిటేటర్లకు ₹65,000 వరకు చెల్లించేలా ఒప్పందాలు చేసుకున్నట్టు సమాచారం. సేకరించిన అండాల సంఖ్య, నాణ్యత తగ్గితే చెల్లించే మొత్తంలో సగం కోత విధించేలా అగ్రిమెంట్లు కుదుర్చుకున్నట్టు తెలుస్తోంది.

జనవరి నుంచి అక్టోబర్ మధ్య 66 మందికి ప్రక్రియలు జరపగా, అధికారులకు 47 మంది రికార్డులు దొరికాయి. మిగిలిన 19 మంది దాతల రికార్డులను ART బ్యాంక్ దాచిపెడుతున్నట్టు గుర్తించినట్టు అధికారులు తెలిపారు.

ఈ రాకెట్‌కు సంబంధించి మల్కాజ్‌గిరి పోలీసులు ఇప్పటివరకు మూడు కేసుల్లో ఎనిమిది మంది నిందితులను అరెస్టు చేశారు.