కొండగట్టు ఆంజనేయ స్వామి చందనోత్సవం: 60 ఏళ్ల తర్వాత నిజరూప దర్శనం

తెలంగాణలోని ప్రసిద్ధ కొండగట్టు ఆంజనేయ స్వామి దేవాలయంలో ఈ నెల 15 నుంచి 20 వరకు చందనోత్సవం జరుగుతుంది. 60 ఏళ్ల తర్వాత స్వామివారి నిజరూప దర్శనం భక్తులకు కలగనుంది.

దేవాలయంలో శని, ఆదివారాల్లో స్వామివారికి చందనం అలదుతారు. ఏళ్ల తరబడి చందనం వేయడంతో స్వామివారి రూపం పూర్తిగా చందనంతో కప్పబడిపోయింది. ఈ చందనోత్సవం 60 ఏళ్లకు ఒకసారి జరుగుతుంది. చందనాన్ని పూర్తిగా తొలగించినప్పుడు స్వామివారి శిలామూర్తి నిజరూపం కనిపిస్తుంది.

నిజరూప దర్శనం నవంబర్ 20 నుంచి డిసెంబర్ 29 వరకు 40 రోజుల పాటు ఉంటుంది. ఒకే రోజులో అందరు భక్తులు దర్శనం చేసుకోలేరు కాబట్టి దేవస్థానం 40 రోజుల పాటు దర్శనం కల్పిస్తోంది. డిసెంబర్ 29న తొలి విడత చందన సమర్పణ జరుగుతుంది. అప్పటి నుంచి మళ్లీ స్వామివారు చందన రూపంలోనే కనిపిస్తారు.

నవంబర్ 15న స్వామివారి శక్తిని కుంభంలోకి ఆవాహన చేసి కళావరోహణం జరుపుతారు. ఆరోజు నుంచి నవంబర్ 20 వరకు స్వామివారు బాలాలయంలో ఉంటారు. ఈ సమయంలో మూలమూర్తి దర్శనం ఉండదు. చందనం తొలగించే పని ఎన్ని రోజులు పడుతుందో ముందే తెలియదు. పరికరాలతో చందనం తొలగించే సమయంలో స్వామివారికి ఇబ్బంది కలగకూడదని ఈ ఏర్పాటు చేస్తారు.

ప్రధాన ముహూర్తం నవంబర్ 20న కార్తీక శుద్ధ ఏకాదశి రోజు ఉదయం 9:57కు. ఆ సమయంలో కుంభాభిషేకం జరుగుతుంది. బెంగళూరు నుంచి వెంకటరామానుజ జీయర్ స్వామి సహా ఇద్దరు జీయర్ స్వాముల ఆధ్వర్యంలో ఉత్సవాలు జరుగుతాయి. ముఖ్యమంత్రి, మంత్రులు, ఎమ్మెల్యేలు, ఎంపీలకు ఆహ్వాన పత్రికలు అందజేశారు.

దేవస్థానం ఆధ్వర్యంలో అన్ని ఏర్పాట్లు చేస్తున్నారు. ఉత్సవ ఫలితంగా తెలంగాణలో పంటలు బాగా పండాలని, ప్రజలు సుఖంగా ఉండాలని అర్చకులు కోరుకున్నారు.