బంగాళాఖాతంలో అల్పపీడనం: 48 గంటల్లో వాయుగుండం, 19 నాటికి తీవ్ర తుఫాను

అండమాన్ సముద్రం పరిసరాల్లో ఏర్పడిన తీవ్ర అల్పపీడనం రాబోయే 48 గంటల్లో వాయుగుండంగా మారే అవకాశం ఉందని వాతావరణ శాఖ తెలిపింది. ఆగ్నేయ బంగాళాఖాతం, అండమాన్ సముద్ర ప్రాంతాల్లో వాతావరణం మారుతోంది.

ఈ అల్పపీడనం పశ్చిమ దిశగా కదులుతూ బలపడుతోంది. ఈ నెల 19 నాటికి ఇది తీవ్ర తుఫానుగా మారే అవకాశం ఉంది. మోడల్స్ ప్రకారం తుఫాను ఆంధ్రప్రదేశ్ తీరం వైపు కదిలే సూచనలు ఉన్నాయి. విశాఖపట్నం, మచిలీపట్నం మధ్య తీరం దాటే అవకాశం ఉందని నిపుణులు భావిస్తున్నారు. దిశ మారితే తమిళనాడు నుంచి ఒడిశా మధ్య ఎక్కడైనా తీరం దాటే అవకాశం ఉందని వాతావరణ శాఖ పరిశీలిస్తోంది.

తుఫాను తీరం దాటే సమయంలో గంటకు 80 నుంచి 100 కిలోమీటర్ల వేగంతో ఈదురుగాలులు వీచే అవకాశం ఉంది. కోస్తాంధ్రలో భారీ నుంచి అతి భారీ వర్షాలు కురిసే అవకాశం ఉంది. శ్రీకాకుళం, విజయనగరం, విశాఖపట్నం, ఉభయ గోదావరి, కృష్ణా, గుంటూరు జిల్లాల్లో భారీ వర్షాలు కురిసే సూచనలు ఉన్నాయి.

వరికోతల సమయం కావడంతో రైతులు ఆందోళన వ్యక్తం చేస్తున్నారు. కోసిన పంట కల్లాల్లో ఉంది. కొన్ని చోట్ల పంట కోతకు సిద్ధంగా ఉంది. అకాల వర్షాలు కురిస్తే తీవ్ర నష్టం జరుగుతుందని రైతులు చెప్తున్నారు.

మత్స్యకారులు వేటకు వెళ్లవద్దని అధికారులు ఆదేశించారు. ఇప్పటికే వేటకు వెళ్లిన వారు వెంటనే తీరానికి తిరిగి రావాలని హెచ్చరికలు పంపారు. ఓడరేవుల్లో ప్రమాద హెచ్చరికలు జారీ చేసేందుకు ఏర్పాట్లు చేస్తున్నారు. రాష్ట్ర ప్రభుత్వం, విపత్తు నిర్వహణ సంస్థ అప్రమత్తమయ్యాయి. తీర ప్రాంత జిల్లాల కలెక్టర్లను అలర్ట్ చేశారు. లోతట్టు ప్రాంతాల ప్రజలను సురక్షిత ప్రాంతాలకు తరలించేందుకు పునరావాస కేంద్రాలను సిద్ధం చేస్తున్నారు. NDRF, SDRF బృందాలను సిద్ధంగా ఉంచారు. వదంతులు నమ్మవద్దని, అధికారిక సమాచారాన్ని మాత్రమే అనుసరించాలని అధికారులు కోరుతున్నారు. రానున్న 48 గంటలు అత్యంత కీలకం.