షేక్ హసినా డిసెంబర్‌లో స్వదేశానికి? భారత్ షరతులు విధించినట్లు కథనాలు

బంగ్లాదేశ్ మాజీ ప్రధాని షేక్ హసినా డిసెంబర్‌లో స్వదేశానికి తిరిగి వెళ్లనున్నట్లు కథనాలు వెలువడుతున్నాయి. ప్రస్తుతం ఆమె భారత్‌లో ఆశ్రయం పొందుతున్నారు. ఈ అంశంపై ఇంకా అధికారిక ప్రకటన రాలేదు.

తిరిగి వెళ్లే విషయంలో భారత్ సుముఖంగానే ఉన్నప్పటికీ, ఆమె భద్రతపై బంగ్లాదేశ్ నుంచి హామీ కోరినట్లు కథనాలు చెబుతున్నాయి. ఆమెపై దాడులు జరగకుండా రక్షణ కల్పించాలని భారత్ షరతు పెట్టినట్లు ఆ కథనాల్లో ఉంది.

తనకు విధించిన మరణ శిక్షపై కోర్టులో అప్పీల్ చేసుకునే అవకాశం ఇవ్వాలని కూడా కోరినట్లు తెలుస్తోంది. నిష్పక్షపాత విచారణ జరిగి న్యాయం జరగాలని, 2024లో చోటు చేసుకున్న ఘటనలపై తిరిగి విచారణ జరపాలని ఆ షరతుల్లో ఉన్నట్లు కథనాలు పేర్కొంటున్నాయి.

హసినాను తీసుకెళ్లేందుకు బంగ్లాదేశ్ తన సైనిక విమానాన్ని పంపాలని భారత్ కోరినట్లు కూడా కథనాలు చెబుతున్నాయి. లేదంటే భూ సరిహద్దు మార్గంలో ఆ దేశ సైన్యం ఆమెను మర్యాదపూర్వకంగా స్వీకరించాలని సూచించినట్లు ఆ కథనాల్లో ఉంది.

ఈ కథనాలపై బంగ్లాదేశ్ ప్రధాని సహాయ మీడియా కార్యదర్శి నజ్ముల్ హాక్ స్పందించారు. హసినాకు ఆశ్రయం ఇచ్చేందుకు ఏ దేశం సుముఖత చూపడం లేదని ఆయన అన్నారు. ఆమెకు అన్ని మార్గాలు ఒక్కొక్కటిగా మూసుకుపోయాయని, చివరి ప్రయత్నంగా ఆమె బంగ్లాదేశ్‌కు తిరిగి రావాలని కోరుతున్నారని ఆయన విమర్శలు చేసినట్లు కథనాలు తెలిపాయి.

అయితే హసినా విషయంలో భారత్ షరతులు విధించినట్లు వస్తున్న కథనాలను బంగ్లాదేశ్ ప్రభుత్వం ధృవీకరించలేదు. ఈ అంశంపై స్పందించేందుకు భారత విదేశాంగ శాఖ ప్రతినిధి రంధీర్ జయస్వాల్ కూడా నిరాకరించారు.