ట్రంప్ కుటుంబం యూఏఈ క్రిప్టో ఒప్పందంపై డెమోక్రాట్ల దర్యాప్తు

అమెరికా అధ్యక్షుడు డొనాల్డ్ ట్రంప్, ఆయన కుటుంబ సభ్యులు, సన్నిహితుల వ్యాపార ప్రయోజనాలపై కాంగ్రెస్‌లో దర్యాప్తు చేపట్టేందుకు డెమోక్రాట్లు సిద్ధమవుతున్నారు. క్రిప్టో సంస్థ వరల్డ్ లిబర్టీ ఫైనాన్షియల్, దాని యూఏఈ లింకులపై ఈ దర్యాప్తులో ప్రత్యేక దృష్టి ఉంటుంది.

ట్రంప్, విట్‌కాఫ్ కుటుంబ సభ్యులు స్థాపించిన ఈ సంస్థలో ట్రంప్‌కు స్వయంగా వాటాలు ఉన్నాయి. వాల్ స్ట్రీట్ జర్నల్ నివేదిక ప్రకారం, యూఏఈ అతిపెద్ద వెల్త్ ఫండ్ అధిపతి, అదే సమయంలో ఆ దేశ జాతీయ భద్రతా సలహాదారు కూడా అయిన వ్యక్తి, 2025 జనవరిలో ట్రంప్ ప్రమాణ స్వీకారానికి నాలుగు రోజుల ముందు 50 కోట్ల డాలర్లకు వరల్డ్ లిబర్టీలో 49 శాతం వాటాను కొనుగోలు చేసేందుకు ఒప్పందం కుదుర్చుకున్నారు. నాలుగు నెలల తర్వాత అమెరికా, యూఏఈతో AI భాగస్వామ్యాన్ని ప్రకటించింది. సున్నితమైన సాంకేతికత చైనా చేతుల్లోకి వెళ్తుందని అధికారులు హెచ్చరించినప్పటికీ, ఆ దేశానికి అత్యాధునిక చిప్‌లను సరఫరా చేసింది.

ఆ ఒప్పందం గురించి తనకు ఏమీ తెలియదని ట్రంప్ చెబుతున్నారు. కానీ ఆ ఒప్పందంపై సంతకం చేసింది ఆయన కుమారుడేనని, మొదటి విడత చెల్లింపుగా సుమారు 18.7 కోట్ల డాలర్లు ట్రంప్ కుటుంబ కంపెనీలకు మళ్లినట్లు నివేదికలు పేర్కొంటున్నాయి. సంస్థ CEO జాక్ విట్‌కాఫ్, మధ్యప్రాచ్యం కోసం ట్రంప్ ప్రత్యేక రాయబారి కుమారుడు.

రాజ్యాంగంలోని ఫారిన్ ఎమోల్యూమెంట్స్ క్లాజ్ ప్రకారం విదేశీ ప్రభుత్వాల నుంచి అధ్యక్షుడు లాభాలు పొందకూడదు. ఈ నిబంధన ఉల్లంఘించారా, దేశ ప్రయోజనాల కంటే కుటుంబ ప్రయోజనాలకే ప్రాధాన్యత ఇచ్చారా అన్నది డెమోక్రాట్ల ప్రధాన ప్రశ్న.

సెనేట్ పర్మనెంట్ సబ్‌కమిటీ ఆన్ ఇన్వెస్టిగేషన్స్‌లో అగ్రస్థానంలో ఉన్న డెమోక్రాట్ రిచర్డ్ బ్లూమెంతల్ 2025 మేలోనే సంస్థ నుంచి రికార్డులు కోరారు. ఆ అభ్యర్థనకు పునాది లేదని సంస్థ సమాధానం ఇచ్చింది. మిడ్‌టర్మ్ ఎన్నికల తర్వాత డెమోక్రాట్లు మెజారిటీ సాధిస్తే, 2027 జనవరి 4లోగా రికార్డులు సమర్పించకపోతే కఠిన చర్యలు తీసుకుంటామని బ్లూమెంతల్ మరో లేఖలో హెచ్చరించారు. అప్పటికి 120వ కాంగ్రెస్ అధికారంలోకి వస్తుంది. సాక్ష్యాలు, వాంగ్మూలాలు సేకరించే సమన్ అధికారాలు ఆ సభకు ఉంటాయి.