విదేశీ పర్యటనలపై వివాదం: రాహుల్ గాంధీని లీడర్ ఆఫ్ అపోజిషన్ నుంచి తొలగించే ప్రతిపాదన తెస్తామన్న బీజేపీ ఎంపీ నిషికాంత్ దూబే

బీజేపీ ఎంపీ నిషికాంత్ దూబే శుక్రవారం పార్లమెంట్‌లో మాట్లాడుతూ, లోక్‌సభలో ప్రతిపక్ష నేతగా రాహుల్ గాంధీని తొలగించాలని ప్రతిపాదన తెస్తామని ప్రకటించారు. 2004 నుంచి 2024 వరకు రాహుల్ గాంధీ చేసిన విదేశీ పర్యటనలు, అనేక రహస్య ఒప్పందాలపై ఆరోపణలు చేశారు. ఈ పర్యటనల సమయంలో ఎవరితో సమావేశమయ్యారో, ఏయే చర్చలు జరిపారో కాంగ్రెస్ బయటపెట్టలేదన్నారు. రాహుల్ గాంధీ విదేశీ పర్యటనల్లో జార్జ్ సోరోస్‌తో సంబంధాలు, 2008లో చైనాతో కాంగ్రెస్ చేసుకున్న రహస్య ఒప్పందం వంటి అంశాలపై దర్యాప్తు జరగాలని డిమాండ్ చేశారు.

ప్రతిపక్ష నేతగా ఉండే వ్యక్తి విదేశాల్లో ప్రభుత్వ విధానాలను వివరించాలని, కానీ రాహుల్ గాంధీ మాత్రం దేశానికి, ప్రభుత్వానికి, రాజ్యాంగానికి వ్యతిరేకంగా మాట్లాడారని ఆరోపించారు. ఈ నేపథ్యంలో లీడర్ ఆఫ్ ది అపోజిషన్ పదవి నుంచి తొలగించే ప్రతిపాదనను తాము తీసుకువస్తామని చెప్పారు.

అంతేకాకుండా, రాహుల్ గాంధీ విదేశీ శక్తుల చేతిలో కీలుబొమ్మలా వ్యవహరిస్తున్నారని, విదేశీ పర్యటనలు, నిధుల సేకరణ వంటివన్నీ దేశ విచ్ఛిన్నానికి కుట్రగా పేర్కొన్నారు. కాంగ్రెస్‌కు విదేశీ నిధులు అందుతున్నాయన్న ఆరోపణలపైనా ఒక ప్రత్యేక దర్యాప్తు బృందాన్ని (ఎస్‌ఐటీ) ఏర్పాటు చేయాలని కేంద్రాన్ని కోరతామన్నారు.

పార్లమెంట్ లోపల, బయట కూడా ప్రతిపక్షాలు నిరసనలు చేస్తున్నాయని, అయితే ఇలాంటి ఆరోపణలపై ముందుగా రాహుల్ గాంధీ జవాబుదారీ తేలాల్సి ఉందన్నారు. ఈ నెలలోనే ప్రతిపాదనపై ముందుకెళ్లేందుకు ప్రయత్నిస్తామని తెలిపారు.