బాంబే హైకోర్టు తరుణ్ తేజ్పాల్‌ను అత్యాచారం కేసులో దోషిగా తేల్చింది

తరుణ్ తేజ్పాల్‌కు బాంబే హైకోర్టు గోవా బెంచ్ అత్యాచారం కేసులో దోషిగా తీర్పునిచ్చింది. 2013లో గోవాలోని హోటల్ లిఫ్ట్‌లో మహిళా సహోద్యోగిపై లైంగిక దాడి చేసిన కేసులో ఆయనను దోషిగా నిర్ధారించింది. 2021లో ట్రయల్ కోర్టు ఇచ్చిన నిర్దోషి తీర్పును హైకోర్టు రద్దు చేసింది.

ఈ కేసును విచారించిన ధర్మాసనంలో జస్టిస్ డాక్టర్ నీలా గోకులే, జస్టిస్ అమిత్ జం సందేకర్ ఉన్నారు. ట్రయల్ కోర్టు తీర్పులో చట్టపరమైన లోపాలు ఉన్నాయని కోర్టు పేర్కొంది. గోవా ప్రభుత్వం తరపున వాదించిన సొలిసిటర్ జనరల్ తుషార్ మెహతా, బాధితురాలు ఎలా ప్రవర్తించాలనే ముందస్తు అభిప్రాయాలతోనే ట్రయల్ కోర్టు తీర్పిచ్చిందని వాదించారు. లైంగిక దాడికి గురైన బాధితులు వారి పరిస్థితులను బట్టి భిన్నంగా స్పందిస్తారని ఆయన వివరించారు.

తేజ్పాల్‌ను తక్షణమే అరెస్ట్ చేయాలని తుషార్ మెహతా కోరారు. ‘అమ్మాయి నో అంటే అది నో అనే సందేశం సమాజానికి వెళ్ళాలి’ అని ఆయన అన్నారు. అయితే తేజ్పాల్ తరఫున కోర్టు కరుణ చూపాలని అభ్యర్థించారు. తాను కూడా బాధితుడినని, తన వయసు 62 ఏళ్లని, హైకోర్ట్ తీర్పుపై అపీల్ చేసుకునేందుకు అవకాశం ఇవ్వాలని కోరారు.

మధ్యాహ్నం 2:30 గంటలకు శిక్షను కోర్టు ప్రకటించనుంది. 2013 నవంబర్లో గోవాలో జరిగిన థింక్ వెస్ట్ కార్యక్రమంలో తేజ్పాల్ తన సహోద్యోగిపై దాడి చేశారనే ఆరోపణ ఉంది. 2017లో ఈ కేసు విచారణ ప్రారంభమైంది.