అమెరికాలోని సెయింట్ లూయిస్ హిందూ దేవాలయంలో ఘనంగా బ్రహ్మోత్సవాలు

అమెరికాలోని సెయింట్ లూయిస్ నగరంలోని హిందూ దేవాలయంలో వేంకటేశ్వర స్వామి బ్రహ్మోత్సవాలు వైభవంగా జరిగాయి. ఆలయం గత మూడేళ్లుగా తిరుమల తిరుపతి దేవస్థానం సంప్రదాయం ప్రకారం వైకానస ఆగమ శాస్త్రాన్ని అనుసరించి ఐదు రోజుల పాటు ఈ ఉత్సవాలు నిర్వహిస్తోంది. దేవాలయం ప్రధాన అర్చకులు రఘునాథాచార్యులు ఈ వివరాలు తెలిపారు.

బ్రహ్మోత్సవం అనేది పరమాత్మకు బ్రహ్మ చేసిన ఉత్సవంగా చెబుతారు. ఈ ఐదు రోజుల ఉత్సవంలో అకల్మష హోమం, అంకురారోపణ, ధ్వజారోహణ, వివిధ వాహన సేవలు నిర్వహిస్తారు. తొలి రోజు ఆలయ శుద్ధి కార్యక్రమాలతో ప్రారంభమై, పంచగవ్య ప్రాసన, అంకురారోపణ చేశారు. రెండో రోజు ఉదయం ధ్వజారోహణతో సర్వదేవత ఆహ్వానం, సాయంత్రం నవకుంభారోపణ, శేషవాహన సేవ జరిగాయి.

మూడో రోజు హనుమద్ వాహన సేవ, నాలుగో రోజు సహస్ర దీపాలంకార సేవ, డోలోత్సవం నిర్వహించారు. ఐదో రోజు గరుడ వాహనంపై స్వామి దర్శనం కల్పించారు. ఆలయ నిర్వాహకులు ప్రత్యేకంగా తమిళనాడు నుంచి వాహనాలను తెప్పించారు. చివరి రోజున శ్రీ పుష్ప యాగం కోసం భారతదేశం నుంచి టన్ను పూలు దిగుమతి చేసి, వేంకటేశ్వర స్వామికి అర్చన చేశారు.

ఆలయ మేనేజ్మెంట్, స్వామి భక్తులు ఎంతో శ్రమతో ఈ కార్యక్రమాన్ని విజయవంతం చేశారు. బ్రహ్మోత్సవం లోక క్షేమం కోసమని, భక్తులకు మోక్ష మార్గంగా భావిస్తారని రఘునాథాచార్యులు తెలిపారు. ఈ ఏడాది కూడా ఘనంగా ముగిసిన ఈ ఉత్సవాన్ని వచ్చే ఏడాది మరింత వైభవంగా నిర్వహించాలని నిర్వాహకులు భావిస్తున్నారు.