ప్రధాని మోదీ భారత్-ఆస్ట్రేలియా సంబంధాలకు ప్రాధాన్యం: బ్రాన్ బ్లాక్

ఆస్ట్రేలియాకు చెందిన ప్రముఖ వ్యాపారవేత్త బ్రాన్ బ్లాక్, ప్రధాని నరేంద్ర మోదీ తొలిసారి ప్రధానిగా బాధ్యతలు స్వీకరించిన నాటి నుంచే భారత్-ఆస్ట్రేలియా ద్వైపాక్షిక సంబంధాలకు అత్యంత ప్రాధాన్యతనిచ్చారని కొనియాడారు. ‘ఆస్ట్రేలియా ఎక్కడ? ఆస్ట్రేలియాతో సంబంధాలు ఎలా ఉన్నాయి?’ అని మోదీ అప్పట్లోనే అడిగారని ఆయన తెలిపారు. ఇరు దేశాల మధ్య సంబంధాలపై మోదీకి ఉన్న ప్రత్యేక దృష్టిని ఇది తెలియజేస్తుందని బ్లాక్ పేర్కొన్నారు. 2035 నాటికి భారత మధ్యతరగతి జనాభా 60 కోట్లకు చేరుతుందన్న అంచనాలు తనకు ఎంతో ఆనందం కలిగించాయని, భారత ప్రభుత్వం చేపడుతున్న సంస్కరణలు ప్రజల జీవితాలపై స్పష్టమైన ప్రభావం చూపుతున్నాయని ఆయన హైలెట్ చేశారు. ఇటీవల ఆస్ట్రేలియన్ సూపర్ సంస్థ భారత జాతీయ మౌలిక సదుపాయాల నిధిలో $500 మిలియన్లు పెట్టుబడి పెట్టేందుకు ఒప్పందం కుదుర్చుకోవడాన్ని ఆయన స్వాగతించారు. భారత్, ఆస్ట్రేలియాలు బలమైన ప్రజాస్వామ్య దేశాలని, ఆర్థికంగా పరస్పరం పూరక శక్తులుగా ఉండటం వల్ల ఈ భాగస్వామ్యం సహజమని బ్లాక్ వ్యాఖ్యానించారు.