హైదరాబాద్‌లో బ్రిక్స్ సమావేశం: ఆర్థిక నేరస్థులను పట్టుకోవడానికి సహకారం అవసరం: రచనా షా

హైదరాబాద్‌లో రెండు రోజుల బ్రిక్స్ అవినీతి నిరోధక వర్కింగ్ గ్రూప్ రెండో సమావేశం జరిగింది. కేంద్ర సిబ్బంది శిక్షణ విభాగం కార్యదర్శి రచనా షా ముఖ్య అతిథిగా హాజరై ప్రసంగించారు. ఆర్థిక నేరాలకు పాల్పడి విదేశాలకు పారిపోయే నిందితులను పట్టుకోవడంలో బ్రిక్స్ సభ్య దేశాల మధ్య సహకారాన్ని పెంచాలని ఆమె పిలుపునిచ్చారు.

అవినీతి సుస్థిర, సమ్మిళిత అభివృద్ధికి ప్రధాన ఆటంకమని రచనా షా ఆందోళన వ్యక్తం చేశారు. పాఠశాలలు, ఆస్పత్రులు వంటి కీలక మౌలిక వసతులకు చేరాల్సిన ప్రజాధనాన్ని అవినీతి దారి మళ్లిస్తోందని, ఇది ప్రజల విశ్వాసాన్ని దెబ్బతీస్తోందని ఆమె తెలిపారు.

నిందితుల గుర్తింపు, అప్పగింత ప్రక్రియలో సహకారం కోసం రూపొందించిన బ్రిక్స్ అసెట్ రికవరీ నిపుణుల నెట్వర్క్ క్రియాశీలం కావడాన్ని ఆమె స్వాగతించారు. వర్చువల్ డిజిటల్ ఆస్తులు, ఫిన్టెక్ మాధ్యమాల ద్వారా జరిగే మనీ లాండరింగ్‌ను అడ్డుకోవడంపై ప్రత్యేక సెషన్లు నిర్వహించారు.

అవినీతి నిరోధానికి సాంకేతికత ఆధారిత పరిపాలనే ఏకైక పరిష్కారమని రచనా షా పేర్కొన్నారు. ఈ రెండు రోజుల సమావేశంలో పలు దేశాల ప్రతినిధులు పాల్గొన్నారు.