హైదరాబాద్‌లో BRICS అవినీతి నిరోధక వర్కింగ్ గ్రూప్ సమావేశం

అంతర్జాతీయ స్థాయిలో పారదర్శకత, జవాబుదారీతనం పెంపొందించే లక్ష్యంతో BRICS దేశాల అవినీతి నిరోధక కార్యచరణ బృందం రెండో సమావేశం హైదరాబాద్‌లో ప్రారంభమైంది.

కేంద్ర సిబ్బంది, శిక్షణ శాఖ (DoPT) కార్యదర్శి రచనా షా ఈ సమావేశాన్ని అధికారికంగా ప్రారంభించారు. అవినీతి నిరోధంలో ముందస్తు అప్రమత్తత, సాంకేతిక ఆధారిత పాలన కీలకమని ఆమె అన్నారు. డిజిటల్ గుర్తింపు, ఎలక్ట్రానిక్ సేవలు, డిజిటల్ చెల్లింపులు, పారదర్శక ప్రభుత్వ కొనుగోలు వ్యవస్థల వల్ల అవినీతి అవకాశాలు తగ్గుతాయని, ప్రజా పర్యవేక్షణ బలోపేతం అవుతుందని వివరించారు.

ఈ సమావేశానికి BRICS సభ్య దేశాల ప్రతినిధులతో పాటు సీనియర్ విధాన రూపకర్తలు, అవినీతి నిరోధక చట్ట అమలు సంస్థల నిపుణులు హాజరయ్యారు. మనీ లాండరింగ్ నిరోధం, ఆస్తుల రికవరీ వంటి అంశాలపై ప్రత్యేక చర్చలు జరిగాయి. జే అశోక్ కుమార్ సభ్యదేశాల ప్రతినిధులకు స్వాగతం పలికారు.

బ్రిక్స్ దేశాల మధ్య అవినీతి నిరోధక సహకారాన్ని మరింత సమర్థవంతంగా చేయడానికి ఇప్పటికే ఉన్న అంతర్జాతీయ వ్యవస్థలతో పునరావృతం కాకుండా, ఆచరణాత్మక విధానాల రూపకల్పనపైనే ఈ సమావేశం దృష్టి సారించినట్లు రచనా షా తెలిపారు.