బ్రిక్స్ పార్లమెంటరీ ఫోరమ్ ముగింపు: ఉగ్రవాదంపై కఠిన వైఖరి, సంయుక్త ప్రకటన ఆమోదం

ఢిల్లీలో రెండు రోజుల పాటు జరిగిన 12వ బ్రిక్స్ పార్లమెంటరీ ఫోరమ్ ముగిసింది. చివరి రోజున సంయుక్త ప్రకటన ఆమోదం పొందింది.

ఉగ్రవాదానికి నిధులు సమకూర్చడం, ఆశ్రయం ఇవ్వడంపై ప్రకటనలో తీవ్ర ఆందోళన వ్యక్తం చేశారు. ఉగ్రవాదం పట్ల సున్నా సహన విధానం అమలు చేయాలని సభ్య దేశాలు పిలుపునిచ్చాయి. ఉగ్రవాదం విషయంలో ద్వంద్వ ప్రమాణాలు ముగియాలని ఫోరమ్ డిమాండ్ చేసింది.

UN ఛార్టర్, దేశాల సార్వభౌమ సమానత్వంపై సభ్య దేశాలు కట్టుబడి ఉన్నట్టు ప్రకటించాయి. UN సెక్యూరిటీ కౌన్సిల్ సంస్కరణలకు ఫోరమ్ మద్దతు తెలిపింది. గ్లోబల్ సౌత్ దేశాలకు ప్రపంచ పాలనలో ఎక్కువ ప్రాతినిధ్యం ఇవ్వాలని కోరింది.

డిజిటల్ పబ్లిక్ ఇన్‌ఫ్రాస్ట్రక్చర్ అభివృద్ధి, విస్తరణకు మద్దతు తెలిపింది. AI వినియోగంలో నైతిక ప్రమాణాలు, పారదర్శకత, జవాబుదారీతనానికి ప్రాధాన్యం ఇవ్వాలని పేర్కొంది. వాతావరణ మార్పుపై ఉమ్మడి బాధ్యత తీసుకోవాలని, దేశాల సామర్థ్యాలకు అనుగుణంగా చర్యలు తీసుకోవాలని ప్రకటనలో పేర్కొన్నారు.

భారత బ్రిక్స్ అధ్యక్షతకు సంయుక్త ప్రకటనలో మద్దతు ప్రకటించారు. యుద్ధం, ఘర్షణలతో సమస్యలు పరిష్కారం కావని లోక్‌సభ స్పీకర్ ఓం బిర్లా అన్నారు. చర్చ, శాంతి, సహకారం ద్వారానే ప్రపంచ సమస్యలకు శాశ్వత పరిష్కారాలు లభిస్తాయని ఆయన తెలిపారు.