హైదరాబాద్: 60 మీటర్ల ఎత్తులో కుతుబ్ షా సమాధి, ఇండో-ఇస్లామిక్ నిర్మాణం

హైదరాబాద్ నగర స్థాపకుడిగా చెప్పబడే మహమ్మద్ కులీ కుతుబ్ షా సమాధి సుమారు 60 మీటర్ల ఎత్తులో ఉంది. ఇది మూడు అంతస్తుల నిర్మాణం. సమాధి పైభాగంలో పెద్ద గుమ్మటం ఉంది.

ఆయన కుతుబ్ షాహీ వంశంలో ఐదవ పాలకుడు. హైదరాబాద్‌లోని చార్మినార్‌ను కట్టించినది కూడా ఆయనే. ప్రపంచవ్యాప్తంగా హైదరాబాద్ అంటే గుర్తుకు వచ్చే నిర్మాణం చార్మినార్ అని చెబుతారు.

మహమ్మద్ కులీ కుతుబ్ షా భాగమతి అనే నాట్యకత్తెను వివాహం చేసుకున్నారు. ఆమెకు హైదర్ బేగం అని పేరు పెట్టారు. ఆ పేరు మీద నుంచే నగర విస్తరణ జరిగిందని, ఆ పేరే హైదరాబాద్‌గా మారిందని చెబుతారు.

సమాధి నిర్మాణం ఇండో-ఇస్లామిక్ శైలిలో ఉంది. గుమ్మటం చుట్టూ నాలుగు దిక్కులా నాలుగు పెద్ద స్తంభాలు, మినార్లు ఉన్నాయి. వాటిపై పువ్వుల అలంకరణలు చెక్కి ఉన్నాయి.

లోపలి భాగంలో ఇండో-ఇస్లామిక్ శైలి తోరణాలు కనిపిస్తాయి. ఇదే తరహా తోరణాలు భువనగిరి గుట్టపై ఉన్న నిర్మాణాల్లోనూ కనిపిస్తాయి. ఆ ప్రాంతంలోనూ కుతుబ్ షాహీ రాజుల కాలంలో నిర్మాణాలు జరిగాయని వివరించారు.