రైతుల విద్యుత్ కోసం ఉపగ్రహ డేటా: TSSPDCL CMD-NRSC భేటీ

రైతులకు మెరుగైన విద్యుత్ సరఫరా కోసం ఉపగ్రహ డేటాను వినియోగించే అంశంపై TSSPDCL CMD జితేష్ పటేల్ హైదరాబాద్‌లోని నేషనల్ రిమోట్ సెన్సింగ్ సెంటర్ (NRSC)ను సందర్శించారు.

NRSC శాస్త్రవేత్తలతో సీనియర్ అధికారులకు ప్రత్యేక సమావేశం జరిగింది. ప్రతి మండలంలో పంటల పరిస్థితి, సాగునీటి అవసరాలు, భూగర్భ జల మట్టాలపై ఉపగ్రహ డేటా సేకరించడంపై చర్చ జరిగింది. ఈ డేటా ఆధారంగా విద్యుత్ డిమాండ్‌ను ముందుగానే అంచనా వేయవచ్చని భావిస్తున్నారు.

ఉపగ్రహ సమాచారాన్ని విద్యుత్ వినియోగ డేటాతో కలిపితే రైతులకు నిరంతర, సమర్థవంతమైన విద్యుత్ అందించే ప్రణాళికలు రూపొందించవచ్చని అధికారులు వివరించారు.

ఎల్ నినో ప్రభావంతో వాతావరణ పరిస్థితులు మారుతున్న నేపథ్యంలో ఈ కసరత్తు చేపట్టారు. సమావేశంలో NRSC శాస్త్రవేత్త ప్రకాష్ చౌహాన్, పలువురు శాస్త్రవేత్తలు, విద్యుత్ శాఖ సీనియర్ అధికారులు పాల్గొన్నారు.