ఆదిలాబాద్ ఆదివాసీ గూడాల్లో మెస్రం వంశస్తుల చదువుల ఉద్యమం

ఆదిలాబాద్ జిల్లాలోని ఆదివాసీ గూడాల్లో మెస్రం వంశస్తులు చదువుల ఉద్యమం ప్రారంభించారు. తాము పవిత్రంగా భావించే నాగోబా ఆలయం ఉన్న ప్రాంతంలోనే శ్రీ నాగోబా స్కూల్‌ను ఏర్పాటు చేశారు. ఇక్కడ ఒకటో తరగతి నుంచి ఏడో తరగతి వరకు బోధన జరుగుతోంది.

గతంలో ఉమ్మడి ఆదిలాబాద్ జిల్లాలో జల్, జంగిల్, జమీన్ కోసం ఈ గిరిజనులు ఉద్యమించారు. ఇప్పుడు విద్య కోసం ముందుకు వచ్చారు. పాఠశాల కోసం ఐదుగురు ఉపాధ్యాయులను నియమించారు. బోధన ఇంగ్లీష్ మీడియంలో జరుగుతోంది.

బడి ప్రారంభమైన రెండు నెలల్లోనే 80 మంది విద్యార్థులు చేరారు. M.Ed, B.Ed పూర్తి చేసిన అర్హత ఉన్న ఉపాధ్యాయులు ఇక్కడ బోధిస్తున్నారు. TLM సాయంతో చిన్న చిన్న బోధన పరికరాలను ఉపాధ్యాయులే తయారు చేస్తున్నారు. గ్లాసుపై అక్షరాలు రాసి పిల్లలకు పదాలు నేర్పిస్తున్నారు. ప్రతి నెలా PTM నిర్వహిస్తున్నారు.

పిల్లల రాత, చదువు, ప్రవర్తనలో మార్పు వచ్చిందని తల్లిదండ్రులు PTM సమావేశంలో చెప్తున్నట్టు ఉపాధ్యాయులు తెలిపారు. వెనుకబడిన విద్యార్థులపై ప్రత్యేక శ్రద్ధ చూపుతున్నామని వారు చెప్పారు. ఆదివాసీ పిల్లలతో పాటు వెనుకబడిన సాధారణ విద్యార్థులను కూడా చేర్చుకుంటున్నారు. బడికి వచ్చే విద్యార్థులందరినీ చేర్చుకుంటామని ఉపాధ్యాయులు చెప్తున్నారు.

నవోదయ, IIT, NEET పరీక్షలకు సన్నద్ధం కావడానికి కోచింగ్ సెంటర్ ఏర్పాటు చేస్తామని మెస్రం వంశస్తులు తెలిపారు. విద్యార్థుల కోసం త్వరలో హాస్టల్ ప్రారంభిస్తామని చెప్పారు. ప్రస్తుతం పాఠశాల ఖర్చులను మెస్రం వంశస్తులే భరిస్తున్నారు.