అర్నబ్ తుఫాను: కాకినాడ తీరంలో సముద్రం 300 మీటర్లు ముందుకు వచ్చే అవకాశం

అర్నబ్ తుఫాను ప్రభావంతో కాకినాడ జిల్లాలో సముద్రం సుమారు 300 మీటర్లు ముందుకు వచ్చే అవకాశం ఉందని విపత్తు నిర్వహణ శాఖ అధికారులు అంచనా వేస్తున్నారు. సముద్ర తీరానికి ఎవరూ వెళ్లకూడదనే హెచ్చరికలో భాగంగానే ఈ అంచనాలు వెల్లడించారు.

పొన్నాడలో 200 మీటర్లు, పేరుపాలెంలో 190 మీటర్లు, మరో తీర ప్రాంతంలో 180 మీటర్ల వరకు సముద్రం ముందుకు రావచ్చని అధికారులు చెప్తున్నారు. తీర ప్రాంత ప్రజలు, మత్స్యకారులు అప్రమత్తంగా ఉండాలని సూచించారు.

తుఫాను గంటకు 20 కిలోమీటర్ల వేగంతో భూవైపు కదులుతోంది. ఇది యానం సమీపంలో తీరం తాకే అవకాశం ఉంది. తీరం తాకే సమయంలో ఇది అతి తీవ్ర తుఫానుగా ఉండనుంది. దీంతో గాలి వేగం, వర్షాల ప్రభావం ఎక్కువగా ఉంటుందని అధికారులు అంచనా వేస్తున్నారు.

కోనసీమ జిల్లాలో తీర ప్రాంతం అల్లకల్లోలంగా మారింది. భారీ ఎత్తున అలలు ఎగిసిపడుతున్నాయి. జిల్లా కలెక్టర్ క్షేత్రస్థాయిలో పర్యటించి, మత్స్యకార కుటుంబాలను పునరావాస కేంద్రాలకు తరలించారు. ఈదురుగాలులకు కొబ్బరి చెట్లు విరిగి పడటంతో కొన్ని రహదారులపై వాహన రాకపోకలు ప్రభావితమయ్యాయి.

అనేక ప్రాంతాల్లో భారీ వర్షాలు కురుస్తుండటంతో లోతట్టు ప్రాంతాలు జలమయమయ్యాయి. హోర్డింగ్లు, బోర్డులు, శిథిల భవనాల దగ్గర నిలబడవద్దని అధికారులు సూచిస్తున్నారు. తుఫాను సమయంలో బయటకు రాకుండా ఇళ్లలోనే ఉండాలని చెప్తున్నారు. హెచ్చరిక సందేశాలు జిల్లా యంత్రాంగాలకు పంపించారు.