బ్రిటిష్‌ పర్యాటకుడు భారత్‌లో ప్రైవేట్ AC స్లీపర్ బస్సు సేవలను ప్రశంసించారు

ఢిల్లీ నుంచి జైపూర్‌కు ప్రైవేట్ ఏసీ స్లీపర్ బస్సులో ప్రయాణించిన బ్రిటిష్ పర్యాటకుడు జాక్ హీటన్, తన అనుభవాన్ని వీడియో ద్వారా పంచుకున్నారు. ఈ బస్సులో లభించిన సౌకర్యాలను ఆయన ప్రశంసించారు.

జాక్ హీటన్ తెలిపిన వివరాల ప్రకారం, ఈ ప్రయాణానికి టికెట్ ధర సుమారు 380 రూపాయలు (4 అమెరికన్ డాలర్లు). బస్సులో ఏసీ, పొడవైన వ్యక్తులు కూడా సౌకర్యంగా పడుకోగలిగే విశాలమైన స్లీపర్ బెర్త్లు ఉన్నాయి. శుభ్రమైన శౌచాలయం కూడా బస్సులోనే అందుబాటులో ఉండడం చూసి ఆయన ఆశ్చర్యపోయారు. ఇంత తక్కువ ఖర్చుకు ఇలాంటి ఉన్నత స్థాయి సౌకర్యాలు ఐరోపాలో బస్సు ప్రయాణాల్లో దొరకడం అరుదని ఆయన అభిప్రాయపడ్డారు. ఐరోపాలో వందల యూరోలు ఖర్చు చేసినా ఇంత నాణ్యమైన సేవలు లభించవని పేర్కొన్నారు.

అలాగే బస్సులో వడ్డించిన భోజనం కూడా ఆయన్ని బాగా ఆకట్టుకుంది. వేడి అన్నం, పప్పు, కూర, చపాతీలు, గులాబ్ జామూన్ వంటి పదార్థాలు అందించారు. మొదట విమానాల్లో ఇచ్చే నాణ్యత తక్కువ ఆహారంలా ఉంటుందేమోనని అనుకున్నానని, కానీ ఈ భోజనం చాలా రుచికరంగా ఉందని, పెద్ద రెస్టారెంట్లలో దొరికే ఆహారంతో సమానమని ఆయన వివరించారు. 7 గంటల సుదీర్ఘ ప్రయాణం సౌకర్యంగా, వేగంగా గడిచిందని చెప్పారు. బస్సు ప్రయాణాలు ఇష్టం లేని తనలాంటి వ్యక్తికి ఇది మరచిపోలేని అనుభవమన్నారు.

జాక్ హీటన్ పోస్ట్ చేసిన ఈ వీడియో సోషల్ మీడియాలో త్వరగా వైరల్ అయ్యింది. నెటిజన్లు దీనిపై సానుకూల స్పందన తెలిపారు. భారతదేశంలో ప్రైవేట్ రంగం అందిస్తున్న రవాణా సేవల నాణ్యతను ఈ సంఘటన చూపిస్తోంది.