పెంబర్తిలో పోలీసులు-BRS శ్రేణుల మధ్య ఘర్షణ; కన్నెపల్లి వెళ్తుండగా కేటీఆర్ వాహనాలకు ఆటంకం

జనగామ జిల్లా పెంబర్తిలో శుక్రవారం పోలీసులకు, BRS శ్రేణులకు మధ్య ఘర్షణ జరిగింది. BRS వర్కింగ్ ప్రెసిడెంట్ కేటీఆర్ కన్నెపల్లి ప్రాజెక్టును సందర్శించేందుకు వెళ్తుండగా, ఆయన వాహనం తప్ప మిగతా వాహనాలను పోలీసులు అడ్డుకున్నారు.

దీంతో పెద్ద సంఖ్యలో BRS కార్యకర్తలు అక్కడికి చేరుకుని నిరసన తెలిపారు. పోలీసులతో వారు తోపులాటకు దిగారు. కేటీఆర్ కూడా పోలీసులతో వాగ్వాదానికి దిగారు. BRS ఎమ్మెల్యేలు పల్లా రాజేశ్వర్ రెడ్డి, కౌశిక్ రెడ్డి భారీ బారికేడ్లను దాటేందుకు ప్రయత్నించారు.

కేటీఆర్ కన్నెపల్లి పంప్‌హౌస్ సందర్శించి, గోదావరి నీటిని రైతుల పంటలకు వినియోగించకపోవడంపై ప్రభుత్వాన్ని నిరసించాలని భావించారు. కాళేశ్వరం ప్రాజెక్ట్ నుంచి ప్రస్తుతం లక్ష క్యూసెక్కుల నీరు సముద్రంలోకి వృథాగా పోతోందని, కన్నెపల్లి వద్ద మోటార్లు ఆన్ చేస్తే రిజర్వాయర్లు నింపి పంటలకు నీరందించవచ్చని ఆయన ఆరోపించారు. ప్రభుత్వం ఉద్దేశపూర్వకంగానే నీటిని పంప్ చేయడం లేదని, తద్వారా రైతులకు నష్టం కలుగుతుందని విమర్శించారు.

ఈ వాదనను తోసిపుచ్చుతూ నీటిపారుదల మంత్రి ఎన్. ఉత్తమ్ కుమార్ రెడ్డి ఇటీవల మాట్లాడుతూ, ప్రాజెక్టు భద్రత కోసమే నీటిని వదిలివేస్తున్నామని, ఎన్డీఎస్ఏ, సీడబ్ల్యూసీ వంటి సంస్థల అనుమతులు వచ్చాకే పంపింగ్ ప్రారంభిస్తామన్నారు. కన్నెపల్లి వివాదం నేపథ్యంలో ఇరు వర్గాల మధ్య రాజకీయ తీవ్రత పెరిగింది.