మెదక్: ఏడుగురు కొడుకులు, ఐదుగురు కూతుళ్లు ఉన్నా 85 ఏళ్ల తండ్రి భిక్షాటన

మెదక్ జిల్లా శివంపేట మండలం నవాపేట గ్రామానికి చెందిన 85 ఏళ్ల మహబూబ్ తన పిల్లలు పట్టించుకోవడం లేదని పోలీసులకు, MPDO కార్యాలయానికి ఫిర్యాదు చేశారు.

ఆయనకు ఏడుగురు కుమారులు, ఐదుగురు కుమార్తెలు ఉన్నారు. పెద్ద కుమారుడు నవాపేట గ్రామంలోనే ఉంటున్నారు. మిగిలిన పిల్లలు హైదరాబాద్‌లో స్థిరపడ్డారు.

ఆరు సంవత్సరాల క్రితం ఆయన భార్య చనిపోయారు. అప్పటి నుంచి పిల్లలు ఎవరూ ఆహారం పెట్టడం లేదని ఆయన చెప్పారు. దీంతో ఆయన భిక్షాటన చేస్తున్నారు.

గత ఏడాది నుంచి ఆరోగ్యం క్షీణించడంతో గ్రామంలో తిరగలేకపోతున్నారు. పిల్లలు తనకు కనీసం ఒక పూట భోజనం పెట్టాలని పలుమార్లు కోరారు. పెద్దల సమక్షంలో పిల్లలకు ఫోన్లు చేయించినా స్పందన రాలేదు.

మూడు రోజుల క్రితం పోలీస్ స్టేషన్‌లో ఫిర్యాదు చేశారు. పోలీసులు పిల్లలకు ఫోన్ చేసినా వారు రాలేదు. సోమవారం MPDO కార్యాలయంలో వ్రాతపూర్వక ఫిర్యాదు అందజేశారు.

ఆయన తనకున్న కొంత భూమి, పశువులను అమ్మి వచ్చిన డబ్బును పిల్లలకే ఇచ్చినట్టు ఫిర్యాదులో తెలిపారు. ప్రస్తుతం ఆయనకు భోజనం కూడా దొరకడం లేదు. ఇప్పటివరకు అధికారుల నుంచి స్పందన లేదు.