మణికొండలో గేటెడ్ కమ్యూనిటీలో ఆరుగురు దుండగుల చొరబాటు; ₹80,000 దొంగతనం

మణికొండలోని ఫ్లోటిల్లా గేటెడ్ కమ్యూనిటీలో ఆరుగురు దుండగులు చొరబడి ఒక ఫ్లాట్లో ₹80,000 విలువైన వస్తువులు, నగదు దొంగిలించారు.

తెల్లవారుజామున 2:45 గంటల ప్రాంతంలో వీరు కమ్యూనిటీ వెనుక వైపు ఉన్న ఫెన్సింగ్ కట్ చేసి లోపలికి వచ్చారు. సుమారు 15 నిమిషాల పాటు సి బ్లాక్ వద్ద వేచి ఉన్నారు. అనంతరం అంతస్తుల్లో తిరుగుతూ చిన్న లాక్ ఉన్న ఫ్లాట్ను గుర్తించారు. నాలుగో అంతస్తులో 403 నంబర్ ఫ్లాట్ తలుపు, తాళం విరగ్గొట్టి లోపలికి వెళ్లారు. ఆ ఫ్లాట్లో ఎవరూ లేరని గుర్తించారు.

సీసీ కెమెరాల్లో దుండగులు ఆయుధాలతో ఉన్నట్టు కనిపించింది. తెల్లవారుజామున 4:45 గంటలకు వీరు బయటకు వస్తుండగా ఓ నివాసి గుర్తించి సెక్యూరిటీకి సమాచారం ఇచ్చారు. నార్సింగి పోలీసులు వెంటనే ఘటనా స్థలానికి చేరుకున్నారు. అప్పటికే దుండగులు వచ్చిన దారిలోనే పారిపోయారు. వీరి కదలికలు సీసీ కెమెరాల్లో రికార్డయ్యాయి.

కమ్యూనిటీ సెక్రటరీ విజయ్ మాట్లాడుతూ, రెసిడెంట్స్ అప్రమత్తంగా ఉండాలని సూచించారు. రాత్రి సమయంలో గేట్లు, తాళాలు జాగ్రత్తగా వేసుకోవాలని, విలువైన వస్తువులను సేఫ్‌లో ఉంచుకోవాలని చెప్పారు.