సంగారెడ్డి జిల్లాలో అల్లం పంటపై కొత్త అగ్గి తెగులు: నివారణకు విత్తన శుద్ధి, పిచికారీ సూచనలు

సంగారెడ్డి జిల్లా జహీరాబాద్ ప్రాంతంలో అల్లం పంటపై ఈ ఏడాది కొత్తగా అగ్గి తెగులు కనిపిస్తోంది. సెప్టెంబర్ నుంచి ఈ తెగులు లక్షణాలు కనిపిస్తున్నాయని శాస్త్రవేత్తలు తెలిపారు. రైతులు దీన్ని ఆకుమచ్చ తెగులుగా భావించి తప్పు మందులు పిచికారీ చేశారు. దీంతో అక్టోబర్ నాటికి తీవ్రత పెరిగింది.

ఈ తెగులు 2024లో కర్ణాటకలో తొలిసారి గుర్తించారు. తర్వాత కేరళలో కనిపించింది. ఈ ఏళ్లు తెలంగాణలోని అల్లం పంటలో కనిపిస్తోంది. ఇది ఒకటి రెండు గ్రామాలకే పరిమితం కాలేదు. పలు గ్రామాలకు వ్యాపించిందని జహీరాబాద్ డిడిడిఎస్ కృషి విజ్ఞాన కేంద్రం ఉద్యాన శాస్త్రవేత్త డాక్టర్ శైలజ తెలిపారు.

ఆకుమచ్చ తెగులులో ఆకుపై నల్లటి మచ్చలు మాత్రమే కనిపిస్తాయి. అగ్గి తెగులులో మొదట చిన్న నల్లటి వలయాకార మచ్చలు ఏర్పడతాయి. ఆ తర్వాత ఆకు మొత్తం ఎండిపోతుంది. మూడో దశకు వచ్చేసరికి దుంప ఊరడం 30 శాతం వరకు తగ్గుతుంది. దుంప లోపల నల్లగా మారి కుళ్లు వాసన వస్తుంది. బరువు కూడా 30 శాతం వరకు తగ్గుతుందని శాస్త్రవేత్తలు గుర్తించారు. ఈ తెగులు ఒక సూక్ష్మజీవి వల్ల వ్యాపిస్తుంది. ఇదే సూక్ష్మజీవి వరి పంటలోనూ కనిపిస్తుంది.

విత్తనం తెచ్చుకున్న వెంటనే Propiconazole ఒక మిల్లీ లీటర్ ఒక లీటర్ నీటికి కలిపి 30 నిమిషాలు నానబెట్టాలి. దీని వల్ల తీవ్రత 50 శాతం వరకు తగ్గుతుంది. సేంద్రీయ పద్ధతిలో ట్రైకోడెర్మా విరిడీ 10 గ్రాములు ఒక లీటర్ నీటికి కలిపి వాడవచ్చు. నాటిన మూడు నుంచి నాలుగు నెలలకు Propiconazole లేదా Tebuconazole ఒక మిల్లీ లీటర్ ఒక లీటర్ నీటికి కలిపి పిచికారీ చేయాలి. తీవ్రత ఎక్కువగా ఉంటే Azoxystrobin ఒక మిల్లీ లీటర్ ఒక లీటర్ నీటికి కలిపి పిచికారీ చేయాలి. దీని వల్ల 70 నుంచి 80 శాతం వరకు తగ్గుతుంది.

ఈ ఏడాది వర్షపాతం తక్కువగా ఉండడంతో రైతులు rain gun ద్వారా అల్లం పంటకు నీరు అందిస్తున్నారు. దీంతో ఆకులు తడిగా ఉండి తెగులు మరింత పెరుగుతోంది. 25 నుంచి 28 డిగ్రీల ఉష్ణోగ్రతలో ఈ తెగులు ఎక్కువగా కనిపిస్తోంది. లక్షణాలు కనిపిస్తే దగ్గరలోని ఉద్యాన అధికారిని, వ్యవసాయ అధికారిని లేదా పరిశోధన కేంద్రాన్ని సంప్రదించాలని సూచించారు. కేరళ నుంచి వచ్చే విత్తన దుంపల వినియోగాన్ని తగ్గించాలని కూడా శాస్త్రవేత్తలు చెప్తున్నారు.