హైదరాబాద్‌లో స్వీపింగ్ యంత్రాలు మూలన: చేతితోనే రోడ్ల శుభ్రత

గ్రేటర్ హైదరాబాద్ పరిధిలో రోడ్లు శుభ్రం చేసే మెకానికల్ స్వీపింగ్ యంత్రాలు దాదాపు రెండేళ్లుగా రోడ్లపైకి రావడం లేదు. డిపోల్లో నిలిచిపోయిన యంత్రాల స్థానంలో పారిశుద్య సిబ్బందే చేతితో రోడ్లు ఊడుస్తున్నారు.

గతంలో నగరంలో 35 నుంచి 40 వరకు భారీ యంత్రాలు పనిచేసేవి. వీటిలో 17 యంత్రాలను GHMC సొంతంగా కొనుగోలు చేసింది. మరో 18కి పైగా యంత్రాలను ఏజెన్సీలు CRMP కాంట్రాక్టుల ద్వారా నడిపేవి. ఒక్కో యంత్రం రోజుకు 30 నుంచి 40 కిలోమీటర్ల మేర ప్రధాన రహదారులను శుభ్రం చేసేది. ఈ యంత్రాల కోసం బల్దియా ఏటా కోట్ల రూపాయల ప్రజాధనాన్ని ఖర్చు చేసింది.

కాంట్రాక్టర్ల నిర్వహణ లోపాలు, GPS ట్యాంపరింగ్ ఆరోపణలు, బిల్లుల వివాదాల కారణంగా ఈ సేవలు రెండేళ్ల క్రితం నిలిచిపోయినట్టు సమాచారం. కోట్ల విలువైన యంత్రాలు డిపోలకే పరిమితమై తుప్పు పట్టాయి. నిజాంపేట, బడంగ్‌పేట, మీర్‌పేట కార్పొరేషన్లలోనూ యంత్రాలు షెడ్లకే పరిమితమయ్యాయి.

దీంతో తెల్లవారుజామున ఫ్లైఓవర్లు, ఎక్స్‌ప్రెస్ రోడ్లపై సిబ్బంది చీపుర్లతో శుభ్రం చేస్తున్నారు. రేడియం జాకెట్లు, సరైన రక్షణ చర్యలు లేకపోవడంతో వేగంగా వెళ్లే వాహనాలకు కార్మికులు ప్రమాదాలకు గురవుతున్నారని కార్మిక సంఘాలు చెబుతున్నాయి. ఇటీవల జరిగిన ప్రమాదాల్లో కార్మికులు మృతి చెందారని కూడా ఆ సంఘాలు పేర్కొంటున్నాయి.

యంత్రాల నిర్వహణపై సమీక్షలు జరుపుతున్నామని అధికారులు చెబుతున్నారు. అయితే ప్రత్యామ్నాయ ఏర్పాట్లు ఇంకా జరగలేదు. యంత్రాలను వెంటనే మరమ్మతు చేసి రోడ్లపైకి తేవాలని కార్మిక సంఘాలు, స్థానికులు డిమాండ్ చేస్తున్నారు.