హైదరాబాద్ విమానాశ్రయంలో క్యాబ్ డ్రైవర్ల నిరసన – 8 నిమిషాల పరిమితిపై వ్యతిరేకత

హైదరాబాద్‌లోని రాజీవ్‌గాంధీ అంతర్జాతీయ విమానాశ్రయంలో క్యాబ్ డ్రైవర్లు నిరసన వ్యక్తం చేశారు. విమానాశ్రయంలో అమలవుతున్న కొత్త ఫాస్ట్‌ ట్రాక్ విధానంపై అసంతృప్తితో ఈ నిరసన జరిగింది.

కొత్త నిబంధన ప్రకారం, ప్రయాణికులను పికప్ చేసేందుకు వచ్చే క్యాబ్‌లకు 8 నిమిషాల ఉచిత సమయం ఇస్తున్నారు. ఈ సమయం దాటితే ₹200 నుంచి ₹250 వరకు అదనపు ఛార్జీ విధిస్తున్నారు. 10 నిమిషాలు దాటితే మరింత ఎక్కువ చార్జీ విధిస్తున్నారు.

క్యాబ్ డ్రైవర్లు మాట్లాడుతూ, ప్రయాణికులు లగేజీ తీసుకోవడానికి, పేమెంట్ చేయడానికి సమయం పడుతుందన్నారు. నెట్వర్క్ సమస్యలు, సిగ్నల్ సమస్యల కారణంగా ప్రక్రియ మరింత ఆలస్యమవుతుందని చెప్పారు. ఒకోసారి 10 నిమిషాలకు మించి సమయం పడుతుంది. ప్రయాణికులను త్వరగా దిగాలని ఒత్తిడి చేయాల్సి వస్తే తమ రేటింగ్‌లు తగ్గిపోయి భవిష్యత్తు బుకింగ్‌లపై ప్రభావం పడుతుందని ఆందోళన వ్యక్తం చేశారు.

పెట్రోల్, డీజిల్ ధరల పెరుగుదల, వాహన నిర్వహణ ఖర్చులు ఇప్పటికే భారంగా ఉండగా, ఈ కొత్త చార్జీలు మరింత ఇబ్బంది కలిగిస్తున్నాయని డ్రైవర్లు తెలిపారు. ఒక్కో ట్రిప్‌లో వచ్చే ఆదాయం నుంచి ఈ చార్జీలు తీసేస్తే మిగిలేది చాలా తక్కువని, జీవనోపాధికి ఇబ్బందిగా మారుతోందని వారు వాపోయారు.

మరోవైపు, జీఎంఆర్ అధికారులు ఈ విధానం ప్రయాణికుల భద్రత, ట్రాఫిక్ రద్దీ నియంత్రణ కోసం తీసుకున్నామని చెప్పారు. ఇప్పటివరకు రోజుకు 4000 వాహనాలు విమానాశ్రయానికి వచ్చేవని, ఈ నియమం అమలుతో అది 2000 వాహనాలకు తగ్గిందన్నారు. దీనివల్ల ప్రయాణికులకు మెరుగైన అనుభవం లభిస్తుందని వివరించారు.

ఈ నేపథ్యంలో క్యాబ్ డ్రైవర్లు 8 నిమిషాల సమయ పరిమితిని పెంచాలని, లేదా వాస్తవ పరిస్థితులకు అనుగుణంగా చార్జీల విధానాన్ని మార్చాలని డిమాండ్ చేస్తున్నారు. ఇతర భారతీయ విమానాశ్రయాల్లో ఇలాంటి విధానం లేదని, తమపై వివక్ష చూపుతున్నారని ఆరోపిస్తున్నారు. ప్రయాణికుల సౌకర్యంతో పాటు గిగ్ వర్కర్ల జీవనోపాధిని కాపాడేలా పరిష్కారం చూపాలని కోరుతున్నారు.

క్యాబ్ డ్రైవర్లు తమ నిరసన కొనసాగిస్తున్నారు. విమానాశ్రయ యాజమాన్యం నుంచి అదనపు స్పందన రావాల్సి ఉంది.