క్యాబేజీ సాగు మెలకువలు: అధిక దిగుబడికి నిపుణుల సూచనలు

శీతాకాలంలో విస్తృతంగా సాగయ్యే కూరగాయల్లో క్యాబేజీ, క్యాలీఫ్లవర్ ప్రధానమైనవి. మార్కెట్ల డిమాండ్ పెరగడంతో రైతులు ఇప్పుడు ఏడాది పొడవునా వీటిని సాగు చేస్తున్నారు.

అధిక దిగుబడి కోసం సరైన రకం ఎంపిక చాలా ముఖ్యం. స్వల్పకాలిక రకాలను ఆగస్టు-సెప్టెంబర్ లో, దీర్ఘకాలిక రకాలను అక్టోబర్-నవంబర్ లో నాటుకోవచ్చు. గోల్డెన్ ఏకర్, ఎర్లీ డ్రమ్ హెడ్, పూస డ్రమ్ హెడ్ వంటి రకాలు, ప్రైవేట్ హైబ్రిడ్ విత్తనాలు రైతులకు అందుబాటులో ఉన్నాయి.

నారుమడి పోసే ముందు విత్తనాలను తప్పనిసరిగా శుద్ధి చేయాలి. కిలో విత్తనానికి 5 మిల్లీలీటర్ల ఇమిడాక్లోప్రిడ్, 3 గ్రాముల కార్బెండజిమ్ కలిపి శుద్ధి చేస్తే తెగుళ్ళ నుంచి రక్షణ లభిస్తుంది. మురుగునీరు పోయే ఎత్తైన స్థలంలో నారుమడి ఏర్పాటు చేయాలి.

ప్రధాన పొలంలో ఎకరాకు 10 టన్నుల పశువుల ఎరువు, 40 కిలోల భాస్వరం, 40 కిలోల పొటాష్ వేసి దుక్కి చేయాలి. మొక్కల మధ్య 45 సెం.మీ, వరుసల మధ్య 45-60 సెం.మీ దూరం ఉండేలా నారు నాటాలి. నత్రజని ఎరువును మూడు దఫాలుగా (20-25, 50-55, 70 రోజుల తర్వాత) ఇవ్వాలి. కలుపు నివారణకు పెంథాలిన్ లేదా అలాక్లోర్ మందును వెంటనే పిచికారీ చేయాలి. నీటి యాజమాన్యంలో బరువు నేలలకు ప్రతి పది రోజులకు, తేలిక నేలలకు వారానికి ఒక తడి ఇస్తే సరిపోతుంది.

క్యాబేజీకి ప్రధాన శత్రువు డైమండ్ బ్యాక్ మాత్. దీని నివారణకు ప్రతి 25 వరుసలకు రెండు వరుసల్లో ఆవాల మొక్కలను ఎర్రపంటగా నాటాలి. పురుగు ఉధృతి ఎక్కువైతే ఎసిఫైట్ లేదా స్పైనోసాడ్ మందును పిచికారీ చేయవచ్చు. ఈ మెలకువలు పాటిస్తే మంచి దిగుబడి, ఆశించిన ఆదాయం పొందవచ్చు.