రైతు భరోసా నిధులు జమ అంటూ ఫేక్ మెసేజ్‌లు.. రైతుల్లో అయోమయం

రైతు భరోసా నిధులు తమ ఖాతాల్లో జమ అయ్యాయంటూ రైతులకు ఫేక్ మెసేజ్‌లు వస్తున్నాయి. రెండు రోజులుగా వస్తున్న ఈ మెసేజ్‌లతో రైతులు అయోమయానికి గురవుతున్నారు.

జగిత్యాల రూరల్ మండలం గుల్లపేట గ్రామంలో పలువురు రైతుల ఫోన్లకు ఈ మెసేజ్‌లు వచ్చాయి. డబ్బులు పడ్డాయని భావించిన రైతులు బ్యాంకులకు వెళ్లారు. ఖాతాలు చెక్ చేసుకోగా నగదు జమ కాలేదు. దీంతో వారు బ్యాంక్ అధికారులను, వ్యవసాయ శాఖ అధికారులను ప్రశ్నించారు.

ఉమ్మడి మెదక్ జిల్లాతో పాటు రాష్ట్రవ్యాప్తంగా పలు జిల్లాల నుంచి ఇలాంటి ఫిర్యాదులు వచ్చాయి. సుమారు 2.73 లక్షల మంది రైతులకు ఈ అనధికారిక మెసేజ్‌లు వెళ్లినట్లు వ్యవసాయ శాఖ గుర్తించింది.

రైతు భరోసా నిధులు విడుదల చేయలేదని అధికారులు స్పష్టం చేశారు. ఈ మెసేజ్‌లపై సైబర్ క్రైమ్ పోలీసులకు ఫిర్యాదు చేశారు. మెసేజ్‌లు ఎక్కడి నుంచి వస్తున్నాయి, ఎవరు పంపుతున్నారు అనే దానిపై దర్యాప్తు చేపట్టారు. ఈ అంశంపై అధికారులు NIC, C-DAC సంస్థలతో చర్చించారు.

కొన్ని మెసేజ్‌ల్లో రబీ సీజన్‌కు రైతు భరోసా మొత్తం ₹12,000కు పెంచారని కూడా ఉంది. రైతు భరోసా నిధులు జమ అయినప్పుడు వచ్చే మెసేజ్‌లతో ఇవి పోలి ఉండటంతో గందరగోళం పెరిగింది. ఇలాంటి మెసేజ్‌లను నమ్మవద్దని వ్యవసాయ శాఖ అధికారులు చెప్తున్నారు.

రబీ సీజన్ నేపథ్యంలో రైతు భరోసా నిధుల జమపై ప్రభుత్వం వెంటనే స్పష్టత ఇవ్వాలని రైతులు కోరుతున్నారు. ఈ మెసేజ్‌లకు కారణం ఏంటి, ఎవరు పంపించారనే దానిపై కూడా స్పష్టత ఇవ్వాలని వారు డిమాండ్ చేస్తున్నారు.