హైదరాబాద్‌లో చెత్త సమస్య: మూడు కార్పొరేషన్లలో నిర్వహణ లోపం, ప్రజలు ఇబ్బంది

హైదరాబాద్‌లో చెత్త సమస్య పరిష్కారం కావడం లేదు. నగరంలోని మూడు కార్పొరేషన్ల పరిధిలో ఇదే పరిస్థితి ఉందని స్థానికులు చెప్తున్నారు. ప్రధాన రహదారుల వెంట చెత్త కుప్పలు పేరుకుపోవడంతో రోజువారీ జీవితం దెబ్బతింటోంది.

అనేక ప్రాంతాల్లో రోజుల తరబడి చెత్త తరలించడం లేదు. దీంతో కొందరు చెత్తను తగలబెడుతున్నారు. ఈ పొగ ఆ ప్రాంతాలను ఆవరించడంతో కళ్లు మండుతున్నాయని స్థానికులు చెప్తున్నారు. వాసన భరించలేక నిద్ర పట్టడం లేదని కూడా వారు చెబుతున్నారు.

చెత్త సేకరణ బాధ్యతలు చూస్తున్న Ramky సంస్థ సరిగ్గా పని చేయడం లేదని ప్రజలు ఆరోపిస్తున్నారు. మూడు కార్పొరేషన్ల అధికారుల పర్యవేక్షణ లేకపోవడం వల్లే ఈ పరిస్థితి ఏర్పడిందని విమర్శలు ఉన్నాయి. రోడ్ల పక్కన చెత్త కనిపించకూడదని CM రేవంత్ రెడ్డి హెచ్చరిక జారీ చేసినా అధికారులు పట్టించుకోవడం లేదని ఆరోపణలు వస్తున్నాయి.

లంగర్ హౌస్ పరిధిలో రోడ్డు పక్కన ఉన్న ఖాళీ స్థలాల్లో చెత్త పేరుకుపోతోంది. కొందరు వ్యాపారులు రాత్రి వేళల్లో దాన్ని తగలబెడుతున్నారని స్థానికులు చెప్తున్నారు. విలీనమైన శివారు మున్సిపాలిటీల్లో పారిశుద్ధ్య నిర్వహణ మరింత సమస్యాత్మకంగా మారింది. ఈ ప్రాంతాల్లో చెత్త సేకరణ, రవాణాకు సరైన ఏర్పాట్లు లేవని ప్రజలు అంటున్నారు.

గతంలో ఉదయం, మధ్యాహ్నం, సాయంత్రం చెత్త తరలిస్తున్నట్టు అధికారులు చెప్పేవారు. ఇప్పుడు కొన్ని చోట్ల ఒక్కసారి కూడా చెత్త తరలించడం లేదని స్థానికులు చెబుతున్నారు. ప్రత్యేక డ్రైవ్‌లో వేల టన్నుల చెత్త తొలగించామని అధికారులు చెప్తుండగా, అవి రోజుల తరబడి తీయని కుప్పలేనని ప్రజలు ఆరోపిస్తున్నారు. రోజూ చెత్త తొలగించాలని, చెత్తను కాల్చే వారిపై చర్యలు తీసుకోవాలని వారు డిమాండ్ చేస్తున్నారు. చెత్త సేకరణలో నిర్లక్ష్యం చేస్తున్న సిబ్బందిపై పర్యవేక్షణ పెంచాలని కూడా కోరుతున్నారు.