ఎల్‌నినో ప్రభావం: కేంద్రం హై అలర్ట్ – పీఎంవో సమీక్షలో కీలక నిర్ణయాలు

దేశంలో ఎల్‌నినో ప్రభావంపై కేంద్రం అప్రమత్తమైంది. ఈ నేపథ్యంలో ప్రధాని కార్యాలయం (పీఎంవో) అత్యున్నత స్థాయి సమీక్ష నిర్వహించింది. వ్యవసాయం, విద్యుత్‌, తాగునీరు, ఆరోగ్యం, వాతావరణ శాఖ సహా 15కి పైగా మంత్రిత్వ శాఖల కార్యదర్శులు ఈ సమీక్షలో పాల్గొన్నారు.

వాతావరణ శాఖ అధికారులు తెలిపిన వివరాల ప్రకారం, గుజరాత్, మధ్యప్రదేశ్, ఛత్తీస్‌గడ్, మహారాష్ట్రలో ఋతుపవనాల రాక 10 రోజులు ఆలస్యమైనప్పటికీ, జూలై తొలి వారంలో కురిసిన వర్షాలతో దేశ సగటు వర్షపాతం లోటు 12 శాతానికి తగ్గింది. అత్యంత ప్రభావితమయ్యే అవకాశమున్న 262 జిల్లాల కోసం ప్రత్యేక వ్యవసాయ అత్యవసర ప్రణాళిక సిద్ధం చేసినట్లు వ్యవసాయ శాఖ కార్యదర్శి వెల్లడించారు.

రైతులకు సహాయంగా కిసాన్ క్రెడిట్ కార్డ్, పీఎం ఫసల్ బీమా యోజన పరిధిని విస్తరించనున్నట్లు ఆయన తెలిపారు. నిత్యావసరాల ధరల స్థితి, రబీ సీజన్‌కు సరిపడా ఎరువుల లభ్యతపై ఆయా శాఖల అధికారులు నివేదికలు సమర్పించారు. గ్రామీణాభివృద్ధి శాఖ ప్రకారం, ఉపాధి కల్పన కోసం మహాత్మా గాంధీ జాతీయ గ్రామీణ ఉపాధి హామీ పథకం (ఎంజీఎన్‌ఆర్‌ఈజీఏ) ద్వారా ఇప్పటికే కోటి పని దినాలు కల్పించారు.

పీఎంవో ప్రిన్సిపల్ సెక్రటరీ పీకే మిశ్రా మాట్లాడుతూ, రాష్ట్రాలతో నిరంతరం సంప్రదింపులు జరుపుతూ తాగునీరు, పశుగ్రాసం కొరత రాకుండా జాగ్రత్తలు తీసుకోవడమే ప్రభుత్వ మొదటి ప్రాధాన్యత అన్నారు. జలాశయాల నీటిని పొదుపుగా వాడేలా చర్యలు చేపట్టాలని అధికారులను ఆదేశించారు.