పశ్చిమాసియా ఉద్రిక్తతలతో హైదరాబాద్‌లో బంగారం, వెండి ధరలు భారీ పతనం

హైదరాబాద్‌లో మంగళవారం బంగారం, వెండి ధరలు భారీగా పడిపోయాయి. పశ్చిమాసియాలో ఉద్రిక్తతలు తీవ్రమవడం, అమెరికా అధ్యక్షుడు డొనాల్డ్ ట్రంప్ ఇరాన్‌తో కాల్పుల విరమణ ముగిసిందని ప్రకటించడం ధరల పతనానికి కారణమని మార్కెట్ వర్గాలు తెలిపాయి.

హైదరాబాద్‌ మార్కెట్‌లో మధ్యాహ్నం 10 గ్రాముల 24 క్యారెట్ బంగారం ధర ₹1,46,730కి చేరింది. ఉదయం ధరతో పోలిస్తే ఇది ₹2,000 పైగా తగ్గుదల. కేజీ వెండి ధర ₹2,28,000కి పడిపోయింది. క్రితం రోజు ధరతో పోలిస్తే వెండి దాదాపు ₹6,000 తగ్గింది.

ఈ పరిణామాలపై సీనియర్ మార్కెట్ విశ్లేషకుడు జీవీ సత్యనారాయణ మాట్లాడుతూ, బ్రెంట్ ముడి చమురు ధరలు పెరగడంతో పెట్టుబడిదారులు బంగారం, వెండిని అమ్ముతున్నారని వివరించారు. ట్రంప్ ప్రకటనతో చమురు ధరలు సెకన్లలో హెచ్చుతగ్గులకు లోనవుతున్నాయని, ఆల్గో సాఫ్ట్‌వేర్‌, ఏఐ ఆధారిత ట్రేడింగ్ వల్ల ఈ తగ్గుదల మరింత వేగంగా జరుగుతుందని ఆయన తెలిపారు. ప్రపంచ దేశాల ఆర్థిక ఒత్తిడి పెరిగినప్పుడు అవి తమ బంగారం నిల్వలను అమ్మేయడం ధరలపై ప్రతికూల ప్రభావం చూపుతుందన్నారు. ప్రస్తుతం బంగారం, వెండి మరింత పడే అవకాశాలు ఉన్నాయని ఆయన అంచనా.

ఇదిలావుండగా, తెలంగాణలో ఆషాడ మాసం, బోనాల పండుగ సందర్భంగా స్వర్ణకారులు ప్రత్యేక ఆఫర్లు ప్రకటించడంతో అమ్మకాలు పుంజుకుంటున్నాయని స్థానిక వ్యాపారులు చెబుతున్నారు. ఆన్‌లైన్‌లో కూడా మేకింగ్ ఛార్జీలు లేకుండా జీఎస్టీ మాత్రమే చెల్లిస్తే చాలు వంటి ఆఫర్లు అందుబాటులో ఉన్నాయి.