135 ఏళ్ల నాటి బ్యాంకింగ్ చట్టం స్థానంలో కొత్త బిల్లు ప్రవేశపెట్టిన కేంద్రం

కేంద్ర ప్రభుత్వం లోక్సభలో బ్యాంకర్స్ బుక్స్ ఎవిడెన్స్ బిల్ 2026 ప్రవేశపెట్టింది. 1891 నాటి బ్యాంకర్స్ బుక్స్ ఎవిడెన్స్ యాక్ట్ స్థానంలో ఈ కొత్త బిల్లు తీసుకొచ్చారు.

పాత చట్టం అమల్లోకి వచ్చినప్పుడు బ్యాంకింగ్ పూర్తిగా కాగితాలపైనే సాగేది. లావాదేవీలన్నీ రిజిస్టర్లు, లెడ్జర్లలో నమోదయ్యేవి. నేడు కోర్ బ్యాంకింగ్, ఇంటర్నెట్ బ్యాంకింగ్, UPI వంటి డిజిటల్ విధానాలు అమల్లో ఉన్నా చట్టం మాత్రం పాతదే కొనసాగుతోంది. ఈ నేపథ్యంలోనే కొత్త బిల్లు తీసుకొచ్చారు.

ఇకపై బ్యాంకుల డిజిటల్ రికార్డులకు పూర్తి చట్టబద్ధత లభిస్తుంది. బ్యాంక్ స్టేట్మెంట్లు, ఆన్లైన్ ట్రాన్సాక్షన్ హిస్టరీ, UPI లావాదేవీలు, క్లౌడ్ స్టోరేజీలోని సమాచారం — ఇవన్నీ కోర్టుల్లో చెల్లుబాటు అయ్యే సాక్షాలుగా పరిగణిస్తారు. డిజిటల్ గా ధృవీకరించిన కాపీలకూ చట్టబద్ధ గుర్తింపు లభిస్తుంది. ఇక ప్రతి కేసుకు బ్యాంకు అధికారులు స్వయంగా కోర్టుకు హాజరుకావాల్సిన అవసరం చాలావరకు తగ్గుతుంది.

ఈ బిల్లు వల్ల సామాన్య ప్రజల బ్యాంక్ ఖాతాల్లో ఎలాంటి మార్పులు ఉండవు. సేవింగ్స్ ఖాతా నిబంధనలు, వడ్డీ రేట్లు, UPI, ATM సేవలు యథావిధిగా కొనసాగుతాయి. ఈ చట్టం కేవలం బ్యాంక్ రికార్డులను కోర్టుల్లో సాక్ష్యాలుగా ఉపయోగించే విధానానికే పరిమితం.

అయితే సైబర్ మోసాలు, చెక్ బౌన్స్ కేసులు, రుణ వివాదాలు, ఆర్థిక నేరాల దర్యాప్తులో డిజిటల్ రికార్డుల చట్టబద్ధత వల్ల విచారణ వేగం పెరిగే అవకాశం ఉందని న్యాయ నిపుణులు అభిప్రాయపడుతున్నారు. భవిష్యత్తులో ఇతర ఆర్థిక సంస్థలకూ ఈ చట్టాన్ని వర్తింపజేసే అధికారం ప్రభుత్వానికి ఉంటుంది.

డిజిటల్ ఎకానమీకి తగ్గట్టుగా న్యాయ, బ్యాంకింగ్ రంగాల మధ్య సమన్వయం పెంచేందుకు ఈ బిల్లు ఒక ముందడుగు అని ప్రభుత్వం పేర్కొంటోంది.