కేంద్రం టెలిగ్రామ్, సిగ్నల్‌కు నోటీసులు – యూజర్ నేమ్ ఫీచర్‌పై వివరణ కోరింది

కేంద్ర ఐటీ మంత్రిత్వ శాఖ టెలిగ్రామ్, సిగ్నల్ మెసేజింగ్ యాప్లకు నోటీసులు జారీ చేసింది. వాటిలో ఉన్న యూజర్ నేమ్ ఫీచర్ వల్ల ఆన్‌లైన్ మోసాలు, ఇంపర్సనేషన్ ముప్పులు పెరుగుతున్నాయని ఆందోళన వ్యక్తం చేస్తూ ఈ నోటీసులు పంపింది.

ఫోన్ నెంబర్ షేర్ చేయకుండా కేవలం యూజర్ నేమ్ తో ఇతరులను కాంటాక్ట్ చేసే ఈ ఫీచర్ ద్వారా సైబర్ నేరాలు, ఫిషింగ్, డిజిటల్ అరెస్ట్ స్కామ్లు మొదలైనవి గణనీయంగా పెరిగే అవకాశం ఉందని ప్రభుత్వం భావిస్తోంది. యూజర్ నేమ్ ఫీచర్ ఎందుకు ఉండాలో సమాధానం చెప్పాలని టెలిగ్రామ్‌ను కేంద్రం డిమాండ్ చేసింది.

ఇప్పటికే వాట్సప్‌కు కూడా ఇదే తరహా నోటీసు పంపిన కేంద్రం, ఇతర మెసేజింగ్ యాప్లపై తన నిఘా పెంచింది. టెలిగ్రామ్‌పై పరీక్షల పేపర్ లీకేజీలు, నకిలీ కంటెంట్ వంటి వివాదాల నేపథ్యంలో ఇప్పటికే ప్రభుత్వ పర్యవేక్షణ ఉంది. భద్రతా కారణాల దృష్ట్యా ఇతర యాప్లపై కూడా చర్యలు తీసుకునే అవకాశం ఉంది.